ԵՐԵՎԱՆ, 6 ՀՈԿՏԵՄԲԵՐԻ, ԱՐՄԵՆՊՐԵՍ: Հարյուրավոր ավստրալահայեր հավաքվել են Կանբերայում ՝ կառավարությանը կոչ անելով բարձրաձայնել բուն հայկական տարածքի վրա հարձակումների մասին՝ նշեով, որ դա մեծ ռազմական հանցագործություն է:

«Արմենպրես»-ի հաղորդմամբ՝ այս մասին հայտնում է The Canberra Times-ը:

Այդ երկրում ադրբեջանական դեսապանատան մոտ են հավաքվել մոտ 500 ցուցարարներ:

The Canberra Times-ը հիշեցրել է, որ Ավստրալիայի արտաքին գործերի նախարար Մարիս Փեյնը նախորդ շաբաթ հայտնել էր, թե իրեն անհանգստացնում է մարտերի բռնկումը, և կողմերին հորդորել է զսպվածություն ցուցաբերել, աջակցել խաղաղ կարգավորման բանակցություններին:

Սակայն ցույցի ընթացքում Ավստրալիայի Հայ դատի հանձնախմբի տնօրեն Հայկ Կայսերյանն ասել է. «Հարձակումը անվանեք հարձակում, ագրեսորին անվանեք ագրեսոր»:

Ցուցարարները նշել են, որ հարյուրավոր անմեղ խաղաղասեր բնիկ հայեր ռմբակոծվում են: Նրանք նաև ասել են, որ հակամարտությունը կարող է վերաճել ևս մեկ Հայոց ցեղասպանության: Հավաքված աստրալահայերը ցանկանում են, որ Ավստրալիայի կառավարությունը միանա Ֆրանսիային՝ դատապարտելու Թուրքիային և Ադրբեջանին: 

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվում և հրթիռակոծվում են նաև խաղաղ բնակավայրերը, այդ թվում՝ մայրաքաղաք Ստեփանակերտը և Շուշին: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները:

Արցախում և Հայաստանում Ադրբեջանի սանձազերծած ագրեսիայի, ողջ զինանոցի կիրառման՝ հրետակոծման, ԱԹՍ հարվածների և հրթիռակոծման հետևանքով 21 քաղաքացիական անձ է զոհվել, վիրավորվել 80-ը: Հաստատված է նաև միջազգայնորեն արգելված կասետային ռումբերի կիրառման փաստը:

Արցախի նկատմամբ Ադրբեջանի սանձազերծած պատերազմում նախնական տվյալներով զոհվել է 240 զինծառայող և կամավորական:

Աննա Գրիգորյան