Գլխավոր դատախազությանը արտահերթ բաց մրցույթի անցկացման հնարավորություն կընձեռնվի
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: ՀՀ Ազգային ժողովն առաջին ընթերցմամբ ընդունեց «Դատախազության մասին» օրենքում լրացում և փոփոխություն կատարելու մասին օրենքի նախագիծը, որով առաջարկվում է Գլխավոր դատախազությանը արտահերթ բաց մրցույթ անցկացնելու հնարավորություն տալ: «Արմենպրես»-ի փոխանցմամբ՝ օրինագիծը հեղինակել են ԱԺ պատգամավորներ Վլադիմիր Վարդանյանն ու Աննա Կարապետյանը:
Վլադիմիր Վարդանյանի խոսքով՝ գործող կարգավորմամբ՝ Գլխավոր դատախազությունը բաց մրցույթ կարող է հայտարարել տարին մեկ անգամ: Պատգամավորներն առաջարկում են անհրաժեշտության դեպքում արտահերթ բաց մրցույթ անցկացնելու հնարավորություն տալ, որը կացնկացվի Գլխավոր դատախազի հանձնարարությամբ:
Վարդանյանը նշեց, որ փոփոխությունը հնարավորություն կտա բավարար ճկունություն ապահովել դատախազությունն ամբողջ տարվա կտրվածքով անհրաժեշտ կադրերով համալրելու առումով:
Օրենքի նախագիծն առաջին ընթերցմամբ ընդունվեց միաձայն՝ 86 «կողմ» ձայնով:
Նորայր Շողիկյան
Բաժանորդագրվեք մեր ալիքին Telegram-ում