Ժամանակը Երևանում՝ 11:07:36,   4 Հունիս

«Նեմրա» խմբի մենակատար Վանը պատմել է ցեղասպանությունից մազապուրծ նախապապերի մասին

«Նեմրա» խմբի մենակատար Վանը պատմել է ցեղասպանությունից մազապուրծ 
նախապապերի մասին

ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: «Նեմրա» ռոք խմբի մենակատար Վան Եղիազարյանը Հայոց ցեղասպանության 105-րդ տարելիցին ներկայացրել է 1915 թվականին Մեծ եղեռնից փրկված նախապապերի պատմությունը:

«Արմենպրես»-ի հաղորդմամբ՝ երգիչը «Ֆեյսբուք»-ի իր էջում գրել է, որ 1915 թվականի Հայոց ցեղասպանության հետևանքով նախապապերը Վանից գաղթել են Արևելյան Հայաստան:

«Նրանց տունը գտնվում էր Փշավան գյուղում (Փշավանք, Փշավանց), Նարեկավանքի մոտ, որտեղ սովորել է Գրիգոր Նարեկացին (Վանա լճի հարավ արևելյան ափին), ասում են, որ այնտեղից լսվում էին նաև Աղթամարի Սուրբ Խաչ եկեղեցու զանգերի ղողանջները: 1915-ին թուրքերը սպանել են պապիս պապին:
Նրա ընտանիքին Արևելյան Հայաստան է հասցրել նրա եղբայրը՝ Մուրադը, որի անունով հետագայում կոչել են հորս:
Նաև ունեցել են քույր, որին որդեգրել են ամերիկացիները, բայց, ցավոք, կապը չի պահպանվել: Սա այն ամենն է, ինչ հասել է ինձ»,-նշել է Վանը:

Նա ընդգծել է, որ հավանաբար բոլորին պարզ է, թե ինչու են ծնողներն իրեն Վան անվանել, իսկ եղբորը՝ Վասպուր:

«Շատ եմ մտածել այնտեղ գնալու մասին, բայց դեռ հոգեպես պատրաստ չեմ տեսնելու մեր հայրենիքը՝ օտարացված ու ավերված:
Ինչքան էլ որ Թուրքիայի կարմիր դրոշը ենթագիտակցությանս մեջ ասոցացվում է մեր արյան հետ, փոքրուց սարսուռ եմ զգացել սպիտակ կիսալուսնով ու աստղերով կարմիր դրոշի հանդեպ, բայց, միևնույն է, իմ կարծիքով, դրոշ վառելը, բոլոր թուրքերի մահը ցանկանալը և նմանատիպ այլ դրսևորումներ ավելի շատ սազական են մեր հանդեպ ցեղասպանություն գործածներին:
Այդպիսի քայլեր անելով՝ ավելի վնաս է հասցվում աշխարհում Հայոց ցեղասպանության ճանաչման գործընթացին և ջուր է լցվում թուրքական քարոզչամեքենայի ջրաղացին:

Օսմանյան կայսրությունը ձախողեց հայերի բնաջնջման իր ծրագիրը և ինչքան էլ փորձեն նենգափոխել պատմությունը, միևնույն է, ամեն հայի հետ ճշմարտությունը կապրի:
Իսկ ցեղասպանությունները դեռ կշարունակեն տեղի ունենալ աշխարհի տարբեր վայրերում, քանի դեռ աշխարհը լուռ է և կույր է ձևանում»,- շեշտել է Վան Եղիազարյանը:

Օսմանյան կայսրության կողմից 1915 թվականին հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն էր: 2020-ին աշխարհասփյուռ հայությունը նշում է Հայոց ցեղասպանության 105-րդ տարելիցը: Ցեղասպանությունը ճանաչել և դատապարտել է մոտ երեք տասնյակ պետություն: 

Անժելա Համբարձումյան

Լուսանկարը՝ Նիկոլայ Մարգարյանի




Այս թեմայով


https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ