ՀՀ-ն նախատեսում է այս տարի անցկացնել «Ընդդեմ ցեղասպանության հանցագործության» չորրորդ գլոբալ ֆորումը
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ։ Հայաստանի Հանրապետությունը նախատեսում է այս տարի անցկացնել «Ընդդեմ ցեղասպանության հանցագործության» չորրորդ գլոբալ ֆորումը։ «Արմենպրես»-ի փոխանցմամբ` այս մասին ապրիլի 21-ին հրավիրված մամուլի ասուլիսի ընթացքում ասաց ՀՀ արտաքին գործերի նախարար Զոհրաբ Մնացականյանը։
«Այս տարի նախատեսում ենք անցկացնել «Ընդդեմ ցեղասպանության հանցագործության» չորրորդ գլոբալ ֆորումը։ Սա արդեն մշտական հարթակ է` միջազգային հանրության փորձագիտական ներուժը համախմբելու ու աշխատելու, զարգացնելու այն գործիքակազմը, որը հնարավորություն է տալիս ազգային ու միջազգային մակարդակներում իրականացնել այդ ցեղասպանության հանցագործության կանխարգելման գործընթացը»,- ասաց Մնացականյանը։
«Ընդդեմ ցեղասպանության հանցագործության» երրորդ գլոբալ ֆորումը տեղի է ունեցել 2018 թվականին։
Ապրիլի 24-ի միջոցառումներին կսահմանափակվի քաղաքացիների մասնակցությունը։ Քաղաքացիների մուտքը կարգելվի Հայոց ցեղասպանության հուշահամալիրի տարածք, սակայն կառավարությունը միջոցառումների շարք է ձեռնարկել, որոնց քաղաքացիները կկարողանան մասնակցել տանից։
Հայաստանի կառավարությունն ապրիլի 14-ին կայացած արտահերթ նիստում ընդունեց hանրապետությունում 2020 թվականի մարտի 16-ին հայտարարված արտակարգ դրության ժամկետը 2020 թվականի ապրիլի 14-ից ժամը 17:00-ից` 30 օրով՝ մինչև 2020 թվականի մայիսի 14-ը ժամը 17:00-ն երկարաձգելու որոշում։ Երկրում գործում է խիստ սահմանափակումների ռեժիմ:
Նորայր Շողիկյան
Բաժանորդագրվեք մեր ալիքին Telegram-ում