ԵՐԵՎԱՆ, 29 ՓԵՏՐՎԱՐԻ, ԱՐՄԵՆՊՐԵՍ: Հայաստանում քրդական համայնքը փետրվարի 29-ին ՄԱԿ-ի գրասենյակի դիմաց ցույց անցկացրեց: Համայնքը միջազգային ատյաններին կոչ է անում թուրքական իշխանություններից պահանջել թույլ տալ փաստաբաններին տեսակցել Թուրքիայում Քրդական աշխատավորական կուսակցության (ՔԱԿ) առաջնորդ Աբդուլլահ Օջալանին և տեղեկանալ նրա առողջական վիճակի մասին:

Լուսանկարները՝ Հայկ Մանուկյանի

«Փետրվարի 27-ին թուրքական իշխանությունները լուր են տարածել, որ Էմրալի կղզում, որտեղ 21 տարի է բանտարկված է քուրդ ժողովրդի առաջնորդ Աբդուլլահ Օջալանը, հրդեհ է բռնկվել: Նրանք այսքանով ավարտել են իրենց հայտարարությունը և այլ տեղեկություն չեն հաղորդել մեր առաջնորդի առողջության, նրա վիճակի մասին: Ամբողջ աշխարհի քուրդ ժողովուրդը ոտքի է կանգնել: Մենք կասկածի ենք ենթարկում թուրքական իշխանությունների սուտ, ստոր, բիրտ  քաղաքականությունը, որովհետև նրանք առաջ էլ մի քանի անգամ հայտարարություն են տարածել, իբր Օջալանը հիվանդ է, որ կզում երկրաշարժ է եղել, և երբ մենք ոտքի կանգնեցինք, պարզվեց, որ այդ հայտարարությունները սուտ են: Այժմ  կասկածում ենք արդյոք մեր առաջնորդին ինչ-որ բան պատահե՞լ է, թե ոչ»,-«Արմենպրես»-ի հաղորդմամբ`շեշտեց  ՀՀ ԱԺ «Իմ քայլը» խմբակցության պատգամավոր, Հայաստանի քրդական համայնքի ղեկավար Կնյազ Հասանովը:

Նա ընդգծեց, որ ցանկանում են աշխարհին ասել, որ թուրքական իշխանություններից պահանջում են թույլ տալ Օջալանի փաստաբաններին, նրա մտերիմներին ու հարազատներին այցելել Օջալանին` տեսնել, թե ինչ վիճակում է նա ու այդ մասին հայտնել բոլոր քրդերին:

Նույնն են պահանջում Թուրքիայում, Սիրիայում, Իրանում, Իրաքում, եվրոպական մի շարք երկրներում ապրող քրդեր:

Համայնքի ներկայացուցիչները նշեցին, որ չեն դադարեցնելու ցույցերը և շարունակեցին հնչեցնել «Կեցցե’ Օջալանը», «Կեցցե’ մեր առաջնորդ ապոն» վանկարկումները:

Աբդուլլահ Օջալանը եղել է քրդական ազատագրական շարժման ղեկավար։ Հանդիսանում է նաև Քրդական բանվորական կուսակցության նախագահը, այժմ դատապարտված է ցմահ ազատազրկման թուրքական Էմրալի կղզում: