«Ժամացույցի զարկերը» բեմադրությունը կներկայացվի երևանյան մի քանի թատրոնում
ԵՐԵՎԱՆ, 24 ՓԵՏՐՎԱՐԻ, ԱՐՄԵՆՊՐԵՍ: Թատրոնի միջազգային օրվան ընդառաջ Հովհ. Թումանյանի անվան պետական տիկնիկային թատրոնի նախաձեռնությամբ Երևանի երեք թատրոնում կներկայացվի Օսվալդ Զագրադնիկի պիեսի հիման վրա բեմադրված «Ժամացույցի զարկերը» ներկայացումը:
«Արմենպրես»-ի հաղորդմամբ`առաջնախաղերը նախատեսված են մարտի 3-ին և 4-ին Տիկնիկային թատրոնում: Տիկնիկայինում այն կներկայացվի նաև ապրիլի 29-30-ին:
Մարտի 3-ի դերասանական կազմում են Արտաշես Շահվերդյանը, Հայկուհի Խուդավերդյանը, Գեորգի Հովակիմյանը, Վանիկ Մկրտչյանը, Կարեն Մարտիրոսյանը, Մարիետա Դովլաթբեկյանը, Հրայր Եղիազարյանը, իսկ մարտի 4-ին բեմ կբարձրանան Դավիթ Հակոբյանը, Էվելինա Շահիրյանը, Գրիգոր Գաբրիելյանը, Սամվել Բաղինյանը, Կարեն Մարտիրոսյանը, Մարիետա Դովլաթբեկյանը, Հրայր Եղիազարյանը:
«Ժամացույցի զարկերը» ներկայացվելու է նաև Գ. Սունդուկյանի անվան ազգային ակադեմիական և Սոս Սարգսյանի անվան Համազգային թատրոններում:
Գաբրիել Սունդուկյանի անվան ազգային ակադեմիական թատրոնում ներկայացումը խաղալու են մարտի 22, 24, 28-ին, Սոս Սարգսյանի անվան Համազգային թատրոնում՝ ապրիլի 5, 6, 10-ին:
Բեմադրության նկարչական ձևավորումն իրականացրել է Կարինե Բաբայանը, ռեժիսորի օգնականը Հրաչյա Գյումբալյանն է, իսկ ռեժիսորը՝ Սամսոն Մովսեսյանը:
Ներկայացումը բեմադրվել է ՀՀ կրթության, գիտության, մշակույթի և սպորտի նախարարության աջակցությամբ:
Բաժանորդագրվեք մեր ալիքին Telegram-ում