ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: «ԱԺ ֆինանսավարկային եւ բյուջետային հարցերի մշտական հանձնաժողովի նախագահի տեղակալ Արտակ Մանուկյանի նախաձեռնությամբ երեկ հրավիրվել էր «Պետական գնումների համակարգի հիմնախնդիրները եւ դրանց լուծման ուղիները» խորագրով խորհրդարանական լսումներ:

«ՀՀ»-ի հետ զրույցում պատգամավորը նշեց, որ պարբերաբար պետական գնումների մասով մտահոգություններ են ստանում տնտեսվարողներից։ Խոսքը վերաբերում է այն բանին, որ ներկա վիճակը կարող է շուկայում հանգեցնել կոնկրետ խաղացողների կենտրոնացվածության աճի եւ խնդրահարույց դարձնել հատկապես փոքր եւ միջին ձեռնարկատիրությունը, որոնք նույնպես մասնակցում են պետական գնումներին։ «Մեր տեսլականն է ապահովել որակ, որի դիմաց պատրատ ենք նաեւ ավելի բարձր վճարել։ Սա ճիշտ մոտեցում է, սակայն պետք է փորձենք այնպիսի մեխանիզմներ մշակել, որը կբացառի արհեստական խաղացողների ներգրավումը, որոնք ունեն գումար, բայց չունեն համապատասխան փորձառություն»,- ասաց Մանուկյանը։

Պետական գնումների մասով օրենսդիրը համեմատաբար քիչ գործիքակազմ ունի, որովհետեւ այս ոլորտը կարգավորվում է երկրորդային օրենսդրությամբ, մասնավորապես, կառավարության որոշումներով։

 Պատգամավորի խոսքով, գնումների համակարգը դինամիկ համակարգ է եւ այն պետք է զարգանա արդի միտումներին համահունչ․ «Եկել է այն փուլը, երբ խնդիրների գույքագրման հիման վրա պետք է բարելավենք գնումների մասին օրենսդրությունը, որպեսզի օրենսդիրն ու գործադիրը նույն ուղղությամբ շարժվեն»»։

            Նյութն ամբողջությամբ կարդացեք թերթի վաղվա համարում: