ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: ՀՀ Ազգային ժողովն առաջին ընթերցմամբ ընդունեց կառավարության հեղինակած «Օզոնային շերտը քայքայող նյութերի մասին» օրենքում փոփոխություն կատարելու մասին» օրենսդրական փաթեթը: «Արմենպրես»-ի փոխանցմամբ՝ այն հունվարի 24-ի խորհրդարանի նիստում ընդունվեց միաձայն՝ 115 կողմ ձայնով:

Ըստ ՀՀ շրջակա միջավայրի նախարարի տեղակալ Իրինա Ղափլանյանի` օրինագծի ընդունումը պայմանավորված է ինչպես Մոնրեալի արձանագրության Կիգալիի փոփոխությամբ եւ դրանից բխող, այնպես էլ ԵՏՄ ոլորտային իրավակարգավորումներով:

Օրենքով կարգավորվում են օզոնային շերտը քայքայող նյութերի եւ այդ նյութերին այլընտրանք հանդիսացող ջերմոցային գազերի՝ հիդրոֆտորածխածինների` Հայաստանի Հանրապետությունում արտադրության, ներմուծման, արտահանման եւ տարանցիկ տեղափոխման նկատմամբ սահմանափակումները եւ դրանց հետ կապված հարաբերությունները` «Օզոնային շերտի պահպանության մասին» Վիեննայի կոնվենցիայի եւ «Օզոնային շերտը քայքայող նյութերի մասին» Մոնրեալի արձանագրության շրջանակներում կնքված միջազգային համապատասխան պայմանագրերը վավերացրած երկրների հետ: