Ժամանակը Երևանում՝ 11:07:36,   23 Հունվար

7 փաստ լոուքոսթերների մասին

7 փաստ լոուքոսթերների մասին

ԵՐԵՎԱՆ, 11 ՀՈՒՆՎԱՐԻ, ԱՐՄԵՆՊՐԵՍ: Չվերթի համար վճարել միջինը ընդամենը 35 եվրո և հայտնվել Հռոմում, Վիեննայում, Սալոնիկում, Բեռլինում կամ այլ եվրոպական քաղաքում. ցանկացած զբոսաշրջիկի համար այս երազանքը շուտով իրականություն կդառնա նաև Հայաստանում: Եվրոպական ամենամեծ՝ Ryanair իռլանդական և Wizz Air հունգարական բյուջետային ավիաընկերությունների կամ լոուքոսթերների շնորհիվ՝ Երևանի «Զվարթնոց» և Գյումրիի «Շիրակ» օդանավակայաններից հնարավոր կլինի ավիատոմսի համար նվազագույն գումար վճարելով մեկնել Եվրոպա: 

Առաջին հայացքից այս խելահեղ առաջարկն իրականում որոշ նրբություններ է պարունակում, որոնց արժե ծանոթանալ: «Արմենպրես»-ը ձեզ համար առանձնացրել է այն կարևոր կետերը, որոնք ցանկալի է իմանալ բյուջետային ավիաընկերության ծառայություններից օգտվելիս:

 

  1. Էժան ավիատոմսի «գինը» սննդից հրաժարվելն է

Բյուջետային ավիաընկերություններն ավիատոմսի համար ամենացածր գինն առաջարկում են ուղևորներին որոշ ավանդական ծառայություններ չմատուցելու հաշվին: Եթե չեք պատրաստվում յուրաքանչյուր ծառայության դիմաց հավելյալ գումար վճարել, ապա ինքնաթիռում կմնաք առանց սննդի:

 

  1. Էժան ավիատոմս՝ թռիչքից ամիսներ առաջ

Եթե ցանկանում եք բյուջետային ավիաընկերությունից հնարավորինս էժան գնով ավիատոմս ձեռք բերել, ապա պետք է ավիատոմսը գնել թռիչքից մի քանի ամիս առաջ: Որքան թռիչքի օրը մոտենա, այնքան ավելի բարձր է լինելու ավիատոմսի արժեքը:

 

  1. Օդանավում բոլորը հավասար են

Բյուջետային ավիաընկերությունների օդանավերում չկան էկոնոմ և բիզնես կարգեր: Բոլոր ուղևորները թռիչքի ընթացքում գտնվում են մեկ կարգում: Օդանավի նստատեղերը նեղ են, չկան բացվող նստատեղեր, ինչն էլ հնարավորություն է տալիս ավելի շատ ուղևոր տեղափոխել:

 

  1. Լոուքոսթերները ձգտում են աշխուժություն մտցնել նաև երկրորդային օդանավակայաններում

Բյուջետային ավիաընկերության չվերթով դուք հիմնականում վայրէջք եք կատարելու ոչ կենտրոնական օդանավակայաններում: Լոուքոսթերները հիմնականում քաղաքներն իրար են կապում երկրորդային օդանավակայաններով:

 

  1. Թռիչք՝ միայն A կետից B կետը

Բյուջետային ավիաընկերությունները տրանզիտ չվերթներ չեն իրականացնում: Դրանցով դուք կարող եք ուղևորվել միայն ուղիղ չվերթով՝ A կետից B կետը:

  1. Յուրաքանչյուր նոր ծառայությունը հավելյալ արժեք է

Եթե, այնուամենայնիվ, չվերթի ընթացքում ցանկանում եք օգտվել հավելյալ ծառայություններից, ապա դրանց համար պետք է վճարեք: Եթե որոշել եք ուղեբեռ տանել ձեզ հետ, և այն ձեռքի ուղեբեռ չէ, ապա յուրաքանչյուր 10-րդ կիլոգրամը հավելյալ արժեք է լինելու: Մի քանի եվրո վճարելու պարագայում կկարողանաք նաև նախօրոք ձեզ հարմար ամրագրել նստատեղը, քանի որ, ի տարբերություն ոչ բյուջետային ավիաընկերությունների, լոուքոսթերներից օգտվելիս պարզ չէ, թե որտեղ ձեզ կնստեցնեն: Հավելյալ գումար վճարելու դիմաց նաև կարող եք ընտանեկան կամ այնպիսի նստատեղեր ամրագրել, որոնք գտնվում են վթարային ելքերի շարքերում: Մատուցվող հավելյալ ծառայությունները և դրանց արժեքները հրապարակված են Ryanair և Wizz air ավիաընկերությունների կայքերում։

 

  1. Լոուքոսթերով թռիչքն ավելի անվտանգ է

 Բյուջետային ավիաընկերություններն օգտագործում են համեմատաբար նոր օդանավեր, և լավ են հետևում դրանց: Վիճակագրության համաձայն՝ եվրոպական ամենամեծ բյուջետային ավիաընկերությունների պատմության ընթացքում չի եղել որևէ խոշոր ավիավթար: Լոուքոսթերները խուսափում են օգտագործել ավելի քան 10 տարվա ինքնաթիռներ, որպեսզի խուսափեն դրանք սարքին վիճակում պահելու համար հավելյալ ծախսերից:

Սովորաբար բյուջետային ավիաուղիները 4 ժամից երկար տևող թռիչքներ չեն կատարում: Եվ ընդունենք, որ շատերին ձեռք կտա էժան թռչելն ու այդ 4 ժամվա ընթացքում չսնվելը: Ինչու ոչ, սա լավ հնարավորություն է ուսանողների, զբոսաշրջիկների համար, կամ՝ հարազատին ու բարեկամին տեսնելու ցանկություն ունեցող մեկի համար, ով էժան ավիատոմսի շնորհիվ կարող է իրեն դա թույլ տալ: Կամ՝ ցանկացած մեկի, ով պարզապես ուզում է միքանիօրյա հանգիստն անցկացնել արտերկրում ու վերադառնալ: Եվ դրա համար պատրաստ են և չորս ժամ ոչինչ չուտել, եւ թեկուզ մի քիչ երկար գրանցվել: 

Մի խոսքով, լոուքոսթերային տարբերակը ճկուն ու իդեալական է նրանց համար, ովքեր պատրաստ են առանց ճոխությունների վայելել երկինքն ու թռիչքը:

Բյուջետային ավիաընկերությունները կամ լոուքոսթերները հիմնադրվել են Ամերիկայի Միացյալ Նահանգներում, որտեղից 1990-ական թվականներին տարածվել են Եվրոպայում, իսկ ավելի ուշ հայտնի դարձել գրեթե ողջ աշխարհում:

Եվրոպական ամենամեծ՝ Ryanair իռլանդական բյուջետային ավիաընկերությունը մուտք է գործում Հայաստանի ավիացիոն շուկա: Առաջին չվերթն ավիաընկերությունը կիրականացնի հունվարի 14-ին՝ Երևանը կապելով Հռոմի և Միլանի հետ, ապա մարտի վերջից կգործի Բեռլինի ուղղությունը, իսկ Գյումրին Գերմանիայի բավարական Մեմինգեն քաղաքի հետ կկապվի մարտի վերջից: Ryanair ավիաընկերությունը հունվարի 3-ին սկսել է տոմսերի վաճառքը ևս 2 նոր ուղղությունների համար` Գյումրի-Աթենք և Երևան-Սալոնիկ:

Դեկտեմբերի 16-ին «Wizz Air» ընկերության կորպորատիվ համագործակցության ղեկավար Անդրաս Ռադոն հայտարարել է, որ «Wizz Air» բյուջետային ընկերությունը Երևանից սկսելու է թռիչքներ իրականացնել ապրիլից: «Ապրիլից սկսում ենք թռիչքներ իրականացնել դեպի Վիեննա, Վիլնյուս: Այս ուղղություններով շաբաթը երկու անգամ կունենանք չվերթներ: Գները լինելու են բավական ցածր` 24.99 եվրոյից սկսած: Արդեն ցանկացողները կարող են ամրագրումներ անել»,- նշել է Ռադոն

 

Նորայր Շողիկյան 

Արմենուհի Մելքոնյան 

 




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ