ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Հայաստանի ֆուտբոլի ֆեդերացիայի տեխնիկական տնօրեն Խինես Մելենդեսի կարծիքով՝ Հայաստանի Մ19 տարեկանների ընտրանուն դժվար պայքար է սպասվում Եվրո-2019-ի A ենթախմբում:

«Հայաստանի ընտրանու համար շատ դժվար է լինելու: Ահավոր բարդ խմբում ենք հայտնվել: Չէի էլ կարող պատկերացնել, որ մի խմբում կհայտնվեն միանգամից աշխարհի նախկին 3 չեմպիոններ»,-«Արմենպրես»-ի հաղորդմամբ` ասաց Մելենդեսը:

Իսպանացի մասնագետի խոսքով` Հայաստանի ընտրանին ամեն ինչ անելու է խմբում ֆավորիտների  գործերը բարդացնելու համար: «Անելու ենք ամեն ինչ՝ մեր ուժերի սահմաններում, և մրցաշարի ավարտին հայ ֆուտբոլիստները որակապես շատ ավելի զարգացած կլինեն»,-եզրափակեց նա:

Ֆուտբոլի Եվրոպայի մինչև 19 տարեկանների առաջնության վիճակահանության արդյունքում Հայաստանի ընտրանին խմբային փուլում կխաղա մրցաշարի հիմնական ֆավորիտների հետ: Վիճակահանության արդյունքում ձևավորվեցին հետևյալ խմբերը. A. Հայաստան, Պորտուգալիա, Իտալիա, Իսպանիա: B. Չեխիա, Իռլանդիա, Նորվեգիա, Ֆրանսիա: Երևանում կայանալիք Եվրոպայի մինչև 19 տարեկանների առաջնությունը կմեկնարկի հուլիսի 14-ին: