Գեղարքունիքի մարզում պետական միջոցներով այս տարի վերականգնելու են ճանապարհների երկու փլվածք
ԳԱՎԱՌ, 30 ՄԱՅԻՍԻ, ԱՐՄԵՆՊՐԵՍ : Գեղարքունիքի մարզում այս տարի պետական միջոցներով նախատեսված է ճանապարհային երկու փլվածքների վերականգնում Երեւան-Սեւան-Իջեւան միջպետական ավտոճանապարհի 67,500 կիլոմետր հատվածում՝ Սեւանի թերակղզու մոտ, եւ Սեւան-Շորժա-Վարդենիս ավտոճանապարհի 32,700 կիլոմետրում՝ Շորժա գյուղի վարչական տարածքում: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի քաղաքաշինության վարչության տրանսպորտի եւ ճանապարհաշինության բաժնի վարիչ Գեւորգ Խաչատրյանը, ճանապարհային փլվածքներն առաջացել են Սեւանա լճի մակարդակի բարձրացման հետեւանքով:»Սեւանի թերակղզու մոտ առաջացած փլվածքը գծամետրով կարճ է, սակայն ունի մոտ 6-7 մետր խորություն, իսկ Շորժայի տարածքում այն կազմում է մինչեւ 150 գծամետր: Այս պահի դրությամբ թեեւ ճանապարհներն այդ հատվածներում երթեւեկելի են, սակայն ժամանակին անհրաժեշտ միջոցառումներ չձեռնարկելու դեպքում դրանք կարող են դառնալ վտանգավոր՝ հանգեցնելով արդեն ճանապարհահատվածների փլուզման»,-ներկայացրեց Գեւորգ Խաչատրյանը: Պետական բյուջեի միջոցներից Սեւանի թերակղզու մոտ առաջացած փլվածքի համար հատկացվել է 25 միլիոն դրամ, Շորժայի վարչական տարածքում առաջացած փլվածքի համար՝ 30 միլիոն դրամ: Երկու դեպքում էլ գործըթացները դեռեւս գտնվում են մրցութային փուլում: Բաժնի վարիչի կարծիքով՝ ճանապարհային փլվածքների վերականգնման աշխատանքները կսկսվեն հուլիս ամսից, երբ մրցույթում հաղթած կազմակերպությունների հետ կկնքվեն աշխատանքային պայմանագրեր:
Խոսրով Խլղաթյան
Բաժանորդագրվեք մեր ալիքին Telegram-ում