Ալիեւը Մյունխենում հանդիպել է ԵԱՀԿ գործող նախագահ Շտայնմայերի հետ
ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ: Ադրբեջանի նախագահ Իլհամ Ալիեւը Մյունխենյան անվտանգության համաժողովի շրջանակում հանդիպել է Գերմանիայի արտաքին գործերի նախարար, ԵԱՀԿ գործող նախագահ Ֆրանկ Վալտեր Շտայնմայերի հետ:
Ինչպես հաղորդում է «Արմենպրես»-ը` վկայակոչելով Գերմանիայի ԱԳՆ-ի մամուլի ծառայությունը, հանդիպման ընթացքում կողմերը քննարկել են ԵԱՀԿ շրջանակում համագործակցության, Լեռնային Ղարաբաղի հակամարտության կարգավորման, էներգետիկայի ոլորտում համագործակցության եւ երկկողմ հարաբերությունների հետ կապված հարցեր:
Ադրբեջանի նախագահի պաշտոնական կայքը հայտնել է, որ Իլհամ Ալիեւը Մյունխենում անվտանգության համաժողովի շրջանակում հանդիպել է նաեւ Եվրամիության ընդլայնման եւ հարեւանության քաղաքականության հարցերով հանձնակատար Յոհանես Հանի հետ:
Հանդիպմանը քննարկվել են քաղաքական իրավիճակը, մարդու իրավունքները եւ Ադրբեջանի ու ԵՄ միջեւ համագործակցությունը:
Բաժանորդագրվեք մեր ալիքին Telegram-ում