ԵՐԵՎԱՆ, 9 ՓԵՏՐՎԱՐԻ, ԱՐՄԵՆՊՐԵՍ: Հայաստանի ու Շվեդիայի հարաբերությունները դինամիկ զարգացում են ունեցել հատկապես երկու երկրներում դեսպանությունների բացման արդյունքում: Այս մասին Շվեդիայի արտգործնախարար Մարգոտ Վալստրյոմի հետ համատեղ ասուլիսին նշեց ՀՀ արտաքին գործերի նախարար Էդվարդ Նալբանդյանը: «2014թ. Ստոկհոլմում մենք՝ տիկին Վալստրյոմի հետ բացեցինք ՀՀ դեսպանությունը: Նաև այստեղ բացվեց Շվեդիայի դեսպանությունը: Դեսպանություններն ակտիվ գործուներություն են ծավալել հարաբերությունների զարգացման, ընդլայնման, խորացման ուղղությամբ»,-ասաց ՀՀ ԱԳ նախարարը: 

«Արմենպրես»-ի փոխանցմամբ` Մարգոտ Վալստրյոմն էլ նկատեց, որ երկկողմ դիվանագիտական կապերի ամրապնդումը մեծ հնարավորություն է ստեղծում ապագայում տնտեսական հարաբերությունների զարգացման առումով: Շվեդ նախարարը նաև նշեց, որ սատարում են Հայաստան-Եվրամիություն նոր համաձայնագրի շուրջ բանակցությունները: 

«Տիկին Վալստրյոմի հետ պայմանավորվեցինք շարունակել բարձր մակարդակով քաղաքական երկխոսությունը, պարբերական դարձնել երկու արտաքին գործերի նախարարությունների միջև խորհրդատվությունները` համագործակցության առավել խորացման նպատակով: Որպես երկկողմ փոխգործակցության զարգացման կարևոր դաշտ առանձնացրինք տեղեկատվական տեխնոլոգիաների ոլորտը: Իհարկե, անդրադարձանք Հայաստան-Եվրամիություն հարաբերություններին: Կարևորեցինք ՀՀ-ԵՄ նոր շրջանակային համաձայնագրի ձեռքբերման շուրջ մեկնարկած բանակցությունները: Մեր բանակցությունների օրակարգում էին Հայաստանում իրականացվող բարեփոխումները և մեր եվրոպական գործընկերների աջակցությունը դրանց»,-ավելացրեց Էդվարդ Նալբանդյանը: 

Շվեդիայի արտաքին գործերի նախարար Մարգոտ Վալստրյոմն առաջին անգամ է Հայաստանում: Ավելի վաղ Մարգոտ Վալստրյոմն այցելել է Հայոց ցեղասպանության հուշահամալիր, հանդիպում ունեցել ՀՀ ԱԳ նախարար Էդվարդ Նալբանդյանի հետ: Կայացել է նաև հանդիպում ՀՀ նախագահի հետ: Նախատեսվում է Շվեդիայի ԱԳ դեսպանի այցը Թումո ստեղծարար տեխնոլոգիաների կենտրոն: