ԱՄՆ-ը քրդերի նկատմամբ Թուրքիայի դիրքորոշումը խոչընդոտ Է համարում Սիրիայի իրադրության կարգավորման համար. The Wall Street Journal
ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: ԱՄՆ-ի իշխանությունները գտնում են, որ այն դիրքորոշումը, որը Թուրքիան որդեգրել Է քրդերի նկատմամբ, հիմնական խոչընդոտներից մեկն Է Սիրիայի իրադրության քաղաքական կարգավորման ճանապարհին եւ լրջորեն խանգարում Է «Իսլամական պետություն» ահաբեկչական խմբավորման դեմ պայքարելուն: Այդ մասին, ինչպես տեղեկացնում Է «Արմենպրես»-ը, փետրվարի 7-ին գրել Է The Wall Street Journal ամերիկյան թերթը:
«Ամերիկացի պաշտոնատարների խոսքով՝ Թուրքիայի թշնամական վերաբերմունքը Սիրիայում գործող քուրդ մարտիկների նկատմամբ, որոնք ԻՊ-ի դեմ պայքարում ԱՄՆ-ի առավել արդյունավետ դաշնակիցների թվում են, խափանում Է այն ջանքերը, որոնք ուղղված են ծայրահեղական այդ խմբավորման դեմ առավել ինտենսիվ մարտական գործողություններ վարելուն»,-նշում Է հրատարակությունը:
Ինչպես գրում Է թերթը, Անկարան արդեն քանիցս հայտարարել Է Վաշինգտոնին, որ Սիրիայում ԱՄՆ-ի քուրդ դաշնակիցները զենքը փոխանցում են Քրդստանի աշխատավորական կուսակցության ներկայացուցիչներին, որոնք իրենց հերթին այն օգտագործում են Թուրքիայի տարածքում: ԱՄՆ-ի իշխանություններն անհիմն են համարում այդ պնդումները, հաղորդել Է ՏԱՍՍ-ը:
Բաժանորդագրվեք մեր ալիքին Telegram-ում