Աշխարհի առաջնորդները Փարիզում փորձում են գլոբալ տաքացման բանակցությունները դուրս բերել կրիտիկական շրջանից
ԵՐԵՎԱՆ, 30 ՆՈՅԵՄԲԵՐԻ, ԱՐՄԵՆՊՐԵՍ: Փարիզում ընթանում է Միավորված ազգերի կազմակերպության «Կլիմայի փոփոխության մասին» շրջանակային կոնվենցիայի կողմ պետությունների 21-րդ համաժողովը, որին մասնակցում են աշխարհի 147 պետությունների առաջնորդներ, այդ թվում՝ ՀՀ Նախագահ Սերժ Սարգսյանը: Այս տարվա համաժողովի թեման է՝ ջերմոցային գազերի արտանետումը մթնոլորտ: Փարիզում աշխարհի առաջնորդները հանդես կգան հայտարարություններով, որպեսզի համաժողովին տրվի քաղաքական ուղերձ հետագա բանակցությունների ու ընդունվելիք միջազգային համաձայնագրի վերաբերյալ:
Կոնվենցիայի կողմ երկրների 21-րդ համաժողովի նպատակն է ընդունել միջազգային իրավական ուժ ունեցող համաձայնագիր` կլիմայի փոփոխությունը գիտականորեն հիմնավորված սահմաններում զսպելու համար: Այդ սահմանն է թույլ չտալ, որ մթնոլորտի գլոբալ տաքացումը գերազանցի 2°C-ը համեմատած նախաարդյունաբերական շրջանի միջին ջերմաստիճանի հետ (ներկայումս այդ ջերմաստիճանը բարձրացել է 0.85 աստիճանով):
«Արմենպրես»-ի փոխանցմամբ` Հայաստանն իր դիրքորոշման մեջ հենվում է արդարության սկզբունքի վրա, նկատի ունենալով կլիմայական համակարգի վրա ներգործելու և կլիմայի փոփոխությունը զսպելու աշխարհի բոլոր մարդկանց իրավահավասարությունը: Ելնելով այդ սկզբունքից՝ Հայաստանը պատրաստակամություն է հայտնում սահմանափակել ջերմոցային գազերի իր գումարային արտանետումների բաժնեմասը 2015-2050թթ. ժամանակահատվածում 633 միլիոն տոննայով, իսկ 2050թ. աստիճանաբար հասնել ջերմոցային գազերի «չեզոք արտանետումների» (տարեկան մոտ 7 միլիոն տոննա), իհարկե, համարժեք միջազգային ֆինանսական, տեխնոլոգիական ու կարողությունների ամրապնդմանը աջակցության դեպքում: Այդ միջոցառումներն ու գործողությունները չպետք է հանգեցնեն սոցիալական և տնտեսական հետընթացի, այլ պետք է նպաստեն Հայաստանի Հանրապետության սոցիալ-տնտեսական զարգացմանը:
Փարիզում կայանալիք կողմ երկրների 21-րդ համաժողովում նախատեսվում է ընդունել իրավական ուժ ունեցող միջազգային համաձայնագիր, ըստ որի աշխարհի բոլոր պետությունները պետք է ստանձնեն Կլիմայի փոփոխության մեղմմանը նպատակաուղղված պարտավորություններ (կամ ինչպես որոշված է անվանել՝ ներդրումներ), ինչպես նաև դրանց իրականացմանը նպատակաուղղված ֆինանսավորման, տեխնոլոգիական համագործակցության և այլ մեխանիզմներ ու դրույթներ:
Միջազգային բանակցություններն ապագա փաստաթղթի շուրջ դեռ ընթանում են, գոյություն ունեն հակասական դիրքորոշումներ զարգացած և զարգացող երկրների միջև հիմնականում երկրների միջև նշված պարտավորությունների բեռի բաշխման, ինչպես նաև Կոնվենցիայի հետագա իրականացման ֆինանսավորման և ֆինանսական մեխանիզմների և այլ դրույթների շուրջ:
Մինչև 2015թ. հոկտեմբերի 1-ը աշխարհի 150 պետություն ներկայացնել է իր դիրքորոշումները և ջերմոցային գազերի արտանետումների սահմանափակման ստանձնելիք պարտավորությունները («Ազգային մակարդակով սահմանված նախատեսվող ներդրումները»-INDC): Կոնվենցիայի քարտուղարությանկողմից դրանց համադրման և ամփոփման նախնական վերլուծությունը ցույց է տալիս, որ եթե ջերմոցային գազերի արտանետումների սահմանափակման ներդրումներն իրականանան ներկայացված ցուցանիշերով, ապա Երկրի մթնոլորտի ջերմաստիճանը կբարձրանա 3-3.5 աստիճան: Այդ վերլուծությունը վկայում է, որ պետք են լրացուցիչ ջանքեր, որպեսզի ջերմոցային գազերի արտանետումների սահմանափակման ավելի հավակնոդ պարտավորություններ ստանձնեն երկրները:
Բաժանորդագրվեք մեր ալիքին Telegram-ում