Կոթի գյուղի 76-ամյա բնակչուհին Ադրբեջանի տարածքում է. ԿԽՄԿ
ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: Կարմիր Խաչի միջազգային կոմիտեն հաստատում է այն տեղեկությունը, որ Կոթի գյուղի 76-ամյա բնակչուհի Լուսիկ Աբովյանը գտնվում է Ադրբեջանի տարածքում: «Արմենպրես»-ի հետ զրույցում այս մասին ասաց ԿԽՄԿ Հայաստանի գրասենյակի հաղորդակցման ծրագրերի պատասխանատու Զառա Ամատունին:
«Մենք արդեն 2 կողմից հաստատում ունենք, որ Հայաստանի քաղաքացին հատել է միջազգային սահմանը և հայտնվել Ադրբեջանում: Ստանալով երկողմանի հաստատումը` ԿԽՄԿ-ն, համաձայն իր գործելաոճի, աշխատում է այն ուղղությամբ, որպեսզի ստանա անհապաղ տեսակցության հնարավորություն քաղաքացու հետ»,- հավելեց Ամատունին, նշելով, որ տեսակցության հարցը կշարունակի քննարկվել պատասխանատու իշխանությունների հետ:
ՀՀ ոստիկանության Նոյեմբերյանի բաժնում հաղորդում էր ստացվել, որ նոյեմբերի 8-ին` ժամը 12:00-ի սահմաններում, Կոթի գյուղի 76-ամյա բնակչուհի Լուսիկ Աբովյանը դուրս է եկել տնից ու հետ չի վերադարձել: Այս մասին «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից:
Ադրբեջանական haqqin.az կայքը, հղում անելով այդ երկրի պաշտպանության նախարարությանը,
հայտնել էր, որ 1942թ. ծնված Լուսինե Աբովյանը նոյեմբերի 8-ին հատել է հայ-ադրբեջանական սահմանը եւ գտնվում է Ղազախի շրջանում:
Բաժանորդագրվեք մեր ալիքին Telegram-ում