ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Twitter ընկերությունն իր հավելվածում գործարկել է նոր գործառույթ, որը թույլ է տալիս հետեւել օրվա կարեւոր իրադարձություններին: Այդ մասին, ինչպես տեղեկացնում է «Արմենպրես»-ը, ասված է միկրոբլոգի կայքում:

Հաղորդագրության համաձայն՝ նորամուծությունն ստացել է Moments («Պահեր») անվանումը: Այն նախատեսված է սովորական օգտատերերի համար, ովքեր չեն ցանկանում գլուխ հանել բարդ ինտերֆեյսից, բայց ձգտում են տեղյակ լինել կարեւորագույն իրադարձություններին:

Հավելվածում հայտնվել է Moments նոր ներդրուկը՝ ամենաքննարկվող թեմաների ցուցակով, որոնք նորացվելու են օրվա ընթացքում: Պահերից յուրաքանչյուրը բովանդակելու է սյուժեի հակիրճ նկարագրումը, տեսագրություն եւ պատկերներ թեմայի վերաբերյալ: Առայժմ նոր գործառույթը հասանելի կլինի միայն ԱՄՆ-ում:

Twitter-ը միկրոբլոգների ծառայություն է համառոտ հաղորդագրությունների հրապարակային փոխանակման համար: Ընկերությունն ստեղծվել է 2006 թվականին եւ միկրոբլոգների առավել մեծ ժողովրդականություն վայելող ցանցն է աշխարհում: Ծառայության ակտիվ օգտատերերի ամսական լսարանը կազմում է 255 մլն մարդ, հաղորդել է ՏԱՍՍ-ը: