ՀՀԿ ղեկավարությունն Ուսուցչի օրվա առթիվ պարգևատրեց լավագույն մանկավարժներին
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Ուսուցչի օրվա առթիվ կրթության ու մանկավարժության բնագավառում ներդրած մեծ ավանդի համար մի խումբ մանկավարժներ արժանացան պատվոգրերի ու շնորհակալագրերի: «Արմենպրես»-ի փոխանցմամբ` հոկտեմբերի 5-ին ՀՀԿ կանանց խորհրդի կողմից կազմակերպված հանդիսավոր միջոցառմանը մասնակցեց և մանկավարժներին ՀՀ Նախագահ, ՀՀԿ նախագահ Սերժ Սարգսյանի անունից պատվոգրեր ու շնորհակալագրեր հանձնեց ՀՀ վարչապետ, Հայաստանի Հանրապետական կուսակցության (ՀՀԿ) նախագահի տեղակալ Հովիկ Աբրահամյանը:
Մատաղ սերնդին ազգային գաղափարախոսության ոգով դաստիարակելու և անմնացորդ նվիրումի համար հանրապետության տարբեր մարզերը ներկայացնող ավելի քան մեկ տասնյակ ուսուցիչներ պարգևատրվեցին ՀՀ վարչապետի հուշամեդալով: Վարչապետը շնորհավորեց ուսուցիչներին մասնագիտական տոնի առթիվ և շնորհակալություն հայտնեց սերունդներին կրթելու ու դաստիարակելու ազգանվեր առաքելությունը պատվով իրականացնելու համար: «Ձեզանից շատ բան է կախված, սիրելի' ուսուցիչներ, և մենք բարձր ենք գնահատում ձեր ներդրումը մատաղ սերնդի կրթության և հայրենասիրական դաստիարակության գործում», - ընդգծեց Հովիկ Աբրահամյանը և վստահեցրեց, որ մանկավարժների խնդիրները մշտապես ՀՀ կառավարության ուշադրության կենտրոնում են:
Դիլիջանի արվեստի պետական քոլեջի փոխտնօրեն, երաժշտագետ, 59 տարվա մանկավարժ Մելսիդա Սարդարյանը վարչապետի կողմից պարգևատրվեց հուշամեդալով:
«Հաջորդ տարի իմ աշխատանքային գործունեության 60-ամյակն եմ նշելու: Շատ վեհ և բարձր գնահատական է մեզ համար մանկավարժությունը: Մենք կրթում ենք, դաստիարակում: Որպեսզի այդ ամենին հասնենք, պետք է առաջին հերթին լինենք հոգեբան: Ամենակարևորը շատ սիրելն է. ես շատ սիրում եմ իմ ուսանողներին և շատ կապված եմ նրանց հետ», -մեզ հետ զրույցում նշեց նա:
Միջոցառմանը մասնակցեցին ԱԺ պատգամավորներ, պետական կառավարման և տեղական ինքնակառավարման մարմինների, հանրապետության մարզերի և մայրաքաղաքի կրթության ոլորտի ներկայացուցիչներ, մանկավարժներ:
Բաժանորդագրվեք մեր ալիքին Telegram-ում