Պորտուգալիայի կառավարող կոալիցիան հաղթանակ է տոնում խորհրդարանական ընտրություններում
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Պորտուգալիայի աջ կենտրոնամետների կառավարող կոալիցիան հաղթանակ է տոնում խորհրդարանական ընտրություններում՝ հավաքելով ընտրողների ձայների 37 տոկոսը: Վերլուծաբաններն այդ հաղթանակը որպես վստահության դրսեւորում են գնահատում այն քաղաքական գործիչների նկատմամբ, ովքեր խնայողության խիստ միջոցներ են կիրառել եւ ավելացրել հարկերը, տեղեկացնում է «Արմենպրես»-ը՝ հղում անելով BBC-ին:
Ընդդիմադիր Պորտուգալիայի Սոցիալիստական կուսակցության առաջնորդ Անտոնիու Կոշտան, որի դաշինքը հավաքել է ձայների 32 տոկոսը, ընդունել է պարտությունը, եւ կոալիցիայի ղեկավար, երկրի գործող վարչապետ Պեդրու Պասուշա Կուելյուին շնորհավորել հաղթանակի կապակցությամբ:
Կառավարության ղեկավարն ինքը նշել է, որ իր կոալիցիան կորցրել է բացարձակ խորհրդարանական մեծամասնությունը:
Նա հատկապես նշել է, որ պատրաստ է մյուս կուսակցությունների հետ համագործակցել բարեփոխումների իրականացման հարցերում:
Վերջին 2,5 տարում Պորտուգալիայում շարունակաբար նվազել է գործազրկության մակարդակը, բայց առանձին փորձագետներ նշում են, որ դեռեւս չի կարելի վստահորեն խոսել երկրի տնտեսության վերականգնման մասին:
Ներկայում Պորտուգալիայի տնտեսությունը դուրս է եկել ռեցեսիայից եւ սկսում է աճել:
Ընդամենը հոկտեմբերի 4-ին կայացած խորհրդարանական ընտրություններին մասնակցել են 13 քաղաքական կուսակցություն եւ երեք կոալիցիա:
Բաժանորդագրվեք մեր ալիքին Telegram-ում