ԱՄՆ-ն պատրաստվում է Թուրքիայից տարհանել իր քաղաքացիներին
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: ԱՄՆ-ի պաշտպանության նախարարության` Պենտագոնի խոսնակ Փիթեր Քուքն ուրբաթօրյա մամուլի ասուլիսում հայտարարել է, որ Թուրքիայի Ինջիրլիք ռազմաբազայի եւ Ադանա քաղաքի հյուպատոսությունների աշխատակիցները ցանկության դեպքում կարող են իրենց ընտանիքներին դուրս բերել Թուրքիայի տարածքից: Նա հայտնել է, որ որոշումը վերաբերվում է Անկարայում ԱՄՆ-ի դեսպանատան, Ստամբուլում ԱՄՆ-ի գլխավոր հյուպատոսության եւ Իզմիրի հյուպատոսության աշխատակիցներին եւս:
Ինչպես հաղորդում է «Արմենպրես»-ը, Պենտագոնի պաշտոնական ներկայացուցիչը հայտնել է, որ հյուպատոսարանների դիվանագետների ընտանիքների ուղեւորության ծախսերը կհոգա ԱՄՆ-ի կառավարությունը:
BBC-ի թուրքական ծառայությունը հայտնել է, որ Թուրքիայից դուրս բերման ենթակա ԱՄՆ-ի քաղաքացիների թիվը մոտ 900 հոգի է, եւ որ այդ որոշումը չի տարածվում Թուրքիայի մյուս շրջաններում բնակվող ԱՄՆ-ի քաղաքացիների վրա:
Փիթեր Քուքը հայտնել է, որ չնայած այդ որոշմանը, Ադանայում ամերիկյան հյուպաոսությունը կշարունակի իր աշխատանքները:
ԱՄՆ-ի պետքարտուղարության խոսնակ Մարկ Թոներն այդ առնչությամբ հայտնել է, որ որոշումը պայմանավորված է Ինջիրլիքի ռազմաբազայի ամերիկյան օդուժի կողմից օգտագործվելու պատճառով «Իսլամական պետություն» (ԻՊ) ահաբեկչական խմբավորման հնարավոր հարձակումների սպառնալիքի հետ:
Associated Press-ն էլ իր հերթին հայտնել է, որ ամերիկացի զինվորականների եւ դիվանագետների ընտանիքների` Թուրքիայից դուրս բերելու առաջարկն արել է ՆԱՏՕ-ի զինված ուժերի հրամանատար Ֆիլիպ Բրիդլովն այն բանից հետո, երբ ԻՊ-ն սպառնացել է հարձակվել Ինջիրլիքի վրա:
Ըստ գործակալության` Պենտագոնի ղեկավար Էշթոն Քարփթերը հաստատել է առաջարկը:
ԱՄՆ Պետքարտուղարությունն ավելի վաղ զգուշացրել էր Թուրքիայում բնակվող եւ ժամանակավորապես գտնվող իր բոլոր քաղաքացիներին` զգույշ լինել «հնարավոր բռնությունների առկայության պատճառով»:
Բաժանորդագրվեք մեր ալիքին Telegram-ում