ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Գերմանական Der Westen պարբերականը և աշխարահռչակ Goal.com կայքը Հայաստանի ազգային հավաքականի առաջատար Հենրիխ Մխիթարյանին ճանաչել են Եվրոպայի լիգայի որակավորման փլեյ-օֆֆ փուլի «Բորուսիա» - «Օդդ» խաղի լավագույն ֆուտբոլիստ: «Ընթացիկ մրցաշրջանում Մխիթարյանի ուժեղ  խաղը դառնում է օրինաչափություն: Այս հանդիպումը չդարձավ բացառություն: Սկզբում նա խփեց սուպերգոլ, հետո էլ երկու անգամ անհավանական ճշգրիտ գոլային փոխանցումներ կատարեց Ռոյսին: Հենրիխը գերազանց էր վերահսկում գնդակը»,-   «Արմենպրես»-ի փոխանցմամբ՝ գրել է Der Westen-ը՝ Մխիթարյանի հետ լավագույն ֆուտբոլիստ համարելով նաև Իլկայ Գյունդողանին:

Իր հերթին, Goal.com-ը նշել է. «Անընդհատ սպառնում էր մրցակցի դարպասին: Հակառակորդի տուգանային մատույցներում անընդհատ համագործակցում էր Ռոյսի հետ: Փոխանցումներն ու հնարքները արդյունավետ էին: Արժանիորեն դարձավ գոլի ու երկու գոլային փոխանցման հեղինակ»: Կայքը Մխիթարյանի հետ լավագույն ֆուտբոլիստ է ճանաչել նաև Մարկո Ռոյսին:

Երեկ կայացած մրցավեճն ավարտվել է  7:2 հաշվով դորտմունդցիների հաղթանակով: Մխիթարյանը դարձել է անչափ գեղեցիկ գոլի հեղինակ և երկու գոլային փոխանցում կատարել:

Մխիթարյանը նոր մրցաշրջանի 7 պաշտոնական խաղում արդեն իսկ դարձել է 8 և 6 գոլային փոխանցման հեղինակ: