ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Քուրդիստանի աշխատավորական կուսակցության (PKK) մարտիկները հրի են մատնել Թուրքիայից Ադրբեջան մեկնող TIR բեռնատարները: Այս մասին, ինչպես հաղորդում է «Արմենպրես»-ը, axar.az կայքին հայտնել են Թուրքիայում բնակվող ադրբեջանցիները:

Ըստ նրանց` PKK-ն այդ հարձակումն իրականացրել է Բիթլիսում: Հետաքրքիր է, որ մեկ շաբաթ առաջ տեղի ունեցած այդ միջադեպի մասին թուրքական մամուլը ոչինչ չի հայտնել:

Թուրքաբնակ ադրբեջացիների խոսքով, ադրբեջանական պետհամարանիշներով TIR-երը բեռներ էին տեղափոխում Թուրքիայից Նախիջեւան: Ադրբեջանցիների արած լուսանկարներում TIR-երից երեքի պետհամարանիշները պարզ երեւում են` 99 HP 581, 10 ZH 886 եւ 10 ZH 771:

Ընդհանուր առմամբ` հրի են մատնվել 7 TIR-եր, որոնցից 6-ն ամբողջությամբ մոխրացել են: Հաջողվել է փրկել միայն մեկ բեռնատար ավտոմեքենա: