Մշակույթի նախարարությունը կաշխատի լուծել Դիլիջանի ժողովրդական արվեստի թանգարանի հատակագծման խնդիրը
ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ: ՀՀ մշակույթի նախարարությունը մինչև տարեվերջ կաշխատի լուծել Հովհաննես Շարամբեյանի անվ. ժողովրդական ստեղծագործության կենտրոնի մասնաճյուղ Դիլիջանի ժողովրդական արվեստի թանգարանի հատակագծային նախագծման խնդիրը՝ այն վերանորոգելու նպատակով: «Արմնեպրես»-ի փոխանցմամբ՝ Տավուշի մարզի Դիլիջան քաղաք կատարած աշխատանքային այցի ընթացքում լրագրողներին այս մասին հայտնեց Մշակույթի նախարար Հասմիկ Պողոսյանը: «Մտահոգիչ էր Շարամբեյանի անվ. ժողովրդական ստեղծագործության կենտրոնի մասնաճյուղի վիճակը, որտեղ անհրաժեշտ է շենքի ընդհանուր վերականգնման աշխատանքներ իրականացնել: Առաջին հերթին, պետք է կազմել թանգարանի նախագիծը, առանց որի որևէ ներդրումային ծրագիր հնարավոր չէ իրականացնել: Ինչպես նաև պետք է հստակեցնել թանգարանի հայեցակարգը: Այս քաղաքը կարող է առաջատար դեր ունենալ կիրառական արվեստի ձևերում»,- նշեց նախարարը:
Դիլիջանի ժողովրդական արվեստի թանգարանն ստեղծվել է 1979թ. բանահավաք և գեղանկարիչ Հովհաննես Շարամբեյանի նախաձեռնությամբ։
Թանգարանի շենքը քաղաքի հնագույն շինություններից է` կառուցված 18-րդ դարավերջին: Տունը պատկանել է իշխանուհի Մարիամ Թումանյանին և ծառայել որպես ամառանոց: Թումանյանն Արցախի մելիքների շառավիղ, շուշեցի ազնվական Մարկոս Դոլուխանյանի դուստրն է: Նա 1890-ական թթ. համիդյան կոտորածներից փրկված գաղթականների համար Դիլիջանում սեփական միջոցներով գորգագործական ֆաբրիկա է բացել, 1919-1920թթ.` որբանոց և արհեստանոցներ: Խորհրդային իշխանության տարիներին Սամսոն Հարությունյանը և Մարիամ Թումանյանը Դիլիջանում գտնվող իրենց ամառանոցը նվիրել են պետությանը:
Սյունազարդ, փայտանախշ պատշգամբով ամառանոցի շենքում հյուրընկալվել են Հովհ. Թումանյանը, Եղիշե Չարենցը, Ֆրիտյոֆ Նանսենը, դերասանուհիներ Սիրանույշը, Ազնիվ Հրաչյան, բանասեր Սերգեյ Վարդանյանը, անվանի գեղանկարիչներ, երաժիշտներ:
Տան վերջին բնակիչը Հովհ. Շարամբեյանն էր, որն էլ շենքը վերածել է ժողովրդական արվեստի թանգարանի:
Բաժանորդագրվեք մեր ալիքին Telegram-ում