ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: Եմենի կառավարական ուժերը հուլիսի 30-ին, արաբական դաշինքի օգնությամբ, որը գլխավորում է Սաուդյան Արաբիան, վերահսկողություն են հաստատել Ադեն քաղաքի ծայրամասում շիա ապստամբների՝ հոուսիների դիրքերի վրա: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, Եմենի Նախագահ Աբդ Ռաբբո Մանսուր ալ Հադիի կողմնակից ուժերը գրավել են Ադենի արևելյան մուտքի մոտ գտվող Մուսլիս ալ Իլմ շրջանը:

Եմենի կառավարական ուժերը Ադեն քաղաքի նկատմամբ վերահսկողությունը վերականգնել են հուլիսի 17-ին:

Մարտերը շարունակվում են ալ Հաջ նահանգի Հուտա քաղաքում, որը գտնվում է Ադենից 30 կմ հեռավորության վրա:

Եմենում իրավիճակն առավել սրվել էր 2015թ. հունվարից, երբ շիա ապստամբները գրավել էին մայրաքաղաք Սանան: Ապստամբների ճնշման տակ Նախագահ Աբդ Ռաբբո Մանսուր ալ Հադին և վարչապետ Խալեդ Բախախը հրաժարական էին տվել: Որոշ ժամանակ անց նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ հետո՝ մարտի 25-ին շիաների Ադեն մտնելուց հետո, հեռացել էր երկրից:

Նախագահը դիմել է Սաուդյան Արաբիային` խնդրելով միջամտել ստեղծված իրավիճակին: Մարտի 26-ին Սաուդյան Արաբիան Բահրեյնի, Քաթաի, Քուվեյթի, ԱՄԷ-ի օդային ուժերի օգնությամբ Եմենում իրականացվել է «Վճռականության փոթորիկ» գործողությունը, որի ավարտից հետո սկսվել է ռազմական գործողությունների մյուս՝ «Հույսի վերականգնում» փուլը: