ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: Հայաստանի կառավարությունը հավանություն տվեց 3,2 մլն դոլարով ՀՀ արտաքին գործերի նախարարության շենքում գտնվող «Արարատ-Ռեստորան» ՍՊԸ-ի բաժնետոմսերը՝ որպես պետական սեփականություն ձեռք բերելու և դրանք «Տանգո» ՓԲԸ-ին օտարելու նախագծին: Ինչպես փոխանցում է «Արմենպրես»-ը՝ գործադիրի նիստում ՀՀ պետական գույքի կառավարման վարչության պետ Արման Սահակյանը հիշեցրեց, որ ՀՀ կառավարության 2012 թվականի դեկտեմբերի 27-ի որոշմամբ Կառավարական N2 մասնաշենքը, որտեղ տեղակայված է ՀՀ ԱԳՆ-ն, օտարվել է «Տանգո» ՓԲԸ-ին:

«Քանի որ  Երևան քաղաքի Հանրապետության հրապարակի Կառավարական տուն N2 շենքի 4 հասցեում գտնվող  անշարժ գույքը պատկանում է «Արարատ-Ռեստորան» ՍՊԸ-ին, անհրաժեշտություն է  առաջացել ձեռք բերել վերոնշյալ ընկերության 100  տոկոս   բաժնեմասը` Կառավարական  N2 մասնաշենքի օտարման գործընթացն ամբողջությամբ իրականացնելու համար»,- ասաց Սահակյանը:

Ի պատասխան վարչապետի հարցի՝ պետգույքի կառավարման վարչության պետը նշեց, որ ռեստորանը գնելու գումարը փոխանցելու է «Տանգո» ընկերությունը:

ՀՀ արտաքին գործերի նախարարության շենքի գնորդ «Տանգո» ընկերությունը պատկանում է արգենտինահայ գործարար Էդուարդո  Էռնեկյանին: