ԳԱՎԱՌ, 29 ՀՈՒԼԻՍԻ, ԱՐՄԵՆՊՐԵՍ: Գեղարքունիքի մարզի Նորատուս գյուղում 2015 թվականի ընթացքում տեղական միջոցների հաշվին կյանքի են կոչվել կենսական նշանակության մի շարք ծրագրեր: Ինչպես «Արմենպրես»-ին տեղեկացրեց Նորատուս  համայնքի ղեկավար Մուրադ Հարությունյանը, այս տարի սկսվել եւ ընթանում են թիվ 2 մանկապարտեզի հիմնանորոգման աշխատանքները:

Ծրագիրը կյանքի կոչելու համար տեղական միջոցներից հատկացվել է 15 միլիոն դրամ: Աշխատանքներն իրականացնում են «ԹԻՎ 28 ՇՄՇ» ԲԲԸ շինարարները: Կատարվում են ներքին հարդարման աշխատանքներ, կառուցվելու է բուժքրոջ սենյակ, ճաշարան եւ հիմնանորոգվելու է սանհանգույցը: Աշխատանքներն ավարտին կհասցվեն մեկ ամսվա ընթացքում: Այս պահին մանկապարտեզը  փակ է, սակայն շուտով իր դռները կբացի 60-80 երեխաների համար: Նորատուսում ընդլայնվել է նաեւ լուսավորվածության ցանցը: Լուսավորվել են գլխավոր փողոցից դուրս եկող մի քանի նրբանցքներ` մոտ 2 կիլոմետր հատվածով: Այս խնդրի կարգավորման համար համայնքապետարանը ներդրել է 9 միլիոն 100 հազար դրամ:

Գյուղում կատարվել են նաեւ ասֆալտապատման եւ ճանապարհների փոսալցման աշխատանքներ: Ասֆալտապատվել են Նարեկացի եւ Թումանյան փողոցները` 1 կիլոմետր հատվածում, որի համար ծախսվել է 63 միլիոն 645 հազար դրամ: Ճանապարհների փոսային նորոգումների համար ծախսվել է 1 միլիոն դրամ, ինչի արդյունքում  նորոգվել են  կենտրոնական փողոցի փոսային հատվածները: Նույն աղբյուրի հավաստմամբ` ընթացքի մեջ են նաեւ գյուղի սելավատարների ու ջրատարների մաքրման աշխատանքները: Մաքրման աշխատանքների համար համայնքից կներդրվի 3 միլիոն 100 հազար դրամ:

Խոսրով Խլղաթյան