Իրաքյան ուժերն ազատագրել են Անբարի նահանգի օլիմպիական մարզադաշտի շրջանը
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Իրաքյան ուժերը հուլիսի 28-ին ազատագրել են երկրի արևմուտքում գտնվող Անբարի նահանգի Ռամադի քաղաքի օլիմպիական մարզադաշտի շրջանը: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, Իրաքի Պաշտպանության նախարարության տեղեկություններով՝ ռազմական գործողությունների ընթացքում սպանվել են «Իսլամական պետության» տասնյակ ահաբեկիչներ, վնասազերծվել են մեծ թվով պայթուցիկ սարքավորումներ, ականապատ տներ:
Ռազմական գործողություններն իրականացվել են իրաքյան բանակի, ոստիկանության, ազգային պաշտպանական ջոկատների, օդային ուժերի մասնակցությամբ: Համատեղ ուժերն այսօր ուղղվել են դեպի Ռամադի քաղաքի արևմտյան հատվածները:
Մյուս կողմից՝ Սալահ ադ Դին նահանգիի Բայջիի շրջանում, երեք ականապատ մեքենաների պայթյուններից 11 մարդ զոհվել, ևս 15-ը վիրավորվել է: Զոհերն ու վիրավորները իրաքյան անվտանգության ուժերի և ազգային պաշտպանական ջոկատների անդամներ են:
Ավելի վաղ՝ հուլիսի 13-ին, իրաքյան բանակի ղեկավարությունը հայտարարել է Անբարի նահանգի ազատագրման ռազմական գործողությունների մեկնարկի մասին: Իրաքի պաշտպանության նախարարի խոսնակ Յահյա ազ Զուբեյդին նշել է, որ ազատագրման գործողությունները սկսվել են հուլիսի 13-ի առավոտյան՝ ավելացնելով, որ զինված ուժերը, ազգային կամավորական ջոկատները, ոստիկանությունը, Անբարի ցեղախմբերը միասնական պայքարում են «Իսլամական պետության» դեմ:
ԻՊ-ի վերահսկողության տակ է գտնվում նահմանգի 80 տոկոսը:
Բաժանորդագրվեք մեր ալիքին Telegram-ում