Այս տարի մայրաքաղաքում տնկվել է մոտ 30 հազար ծառ և թուփ
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Այս տարի մայրաքաղաքում տնկվել է 29 հազար 850 ծառ և թուփ, որոնց կպչունակությունը կազմել է 60-70%: Այս մասին հուլիսի 28-ին լրագրողներին տեղեկացրեց Երևանի քաղաքապետարանի աշխատակազմի բնապահպանության վարչության պետ Ավետ Մարտիրոսյանը:
«Մինչև 90-ական թվականները մայրաքաղաքում կանաչապատման աշխատանքները կատարվել են տարերային, որն այսօր համահունչ չէ կանաչապատման մշակույթին, քանի որ մենք ունենք ծանր մետաղներով աղտոտվածություն, և կանաչապատումն ու ծաղկապատումը պետք է կազմակերպենք այնպիսի բուսատեսակներով, որոնք հնարավորություն կտան կլանելու ծանր մետաղները»,- «Արմենպրես»-ի հաղորդմամբ՝ նշեց Ավետ Մարտիրոսյանը:
Մայրաքաղաքի բնապահպանության վարչության պետը հայտնեց, որ Երևանում հիմնականում ծառապատումը կատարվում է հացենիով, կաղնով, սոսիով, թխկիով և ակացիայով, որոնք կպչունակ են, չորադիմացկուն և հարմարվում են Երևանի բնակլիմայական պայմաններին:
Բաժանորդագրվեք մեր ալիքին Telegram-ում