Սփյուռքը խորհրդանշող Համահայկական խաղերի ջահը վառվեց Եգիպտոսում
ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Անթիլիասի Մայր Տաճարում Արամ Ա կաթողիկոսի օրհնությամբ վառված և սփյուռքը խորհրդանշող ջահը Եգիպտոսում է:
Սփյուռքի ամենահին ու ավանդույթներով հարուստ այս գաղթօջախը միշտ առանձնացել է իր համախմբվածությամբ ու հավաքան ուժով: Այն այս անգամ էլ չխախտեց ավանդույթն ու համախմբվեց միասնականության գաղափարի շուրջ: Հահմահայկական ամառային վեցերորդ խաղերի սփյուռքյան ջահը, շրջելով Միջին Արևելքը, հասավ Կահիրե:
Միջին Արևելքի հնագույն մայրաքաղաք Կահիրեում համահայկականի վեցերորդ խաղերի ջահը դիմավորեցին Եգիպտոսում Հայաստանի արտակարգ և լիազոր դեսպան Արմեն Մելքոնյանը, Համահայկական խաղերի համաշխարհային կոմիտեի գլխավոր քարտուղար Բագրատ Բուռնազյանը, գործկոմի անդամներ Պերճ Հալաջյանը, Վարդ Ալեքսանյանը, հայ համայնքի ներկայացուցիչներ, տեղի ավանդական կուսակցությունների և հասարակական ու բարեգործական կազմակերպությունների ներկայացիչներ: Սուրբ Գրիգոր Լուսավորիչ մայր եկեղեցում մատուցվեց պատարագ:
Դեսպան Արմեն Մելքոնյանը համահայկական խաղերը համարեց հայերի միասնականությունը ևս մեկ անգամ աշխարհին ցույց տալու լավագույն միջոց: «Համահայկական խաղերն ուղերձ են հատկապես Ցեղասպանության 100-րդ տարելիցի միջոցառումների շրջանակում ներկայանալու որպես պահանջատեր, ցույց տալու հայի հաղթող տեսակը»,-ասաց Մելքոնյանը:
Համահայկական խաղերի ստեղծման առաջին օրերից խաղերի անցկացման և կազմակերպման գործում կարևոր ներդրում ունեցած Պերճ Հալաջյանի խոսքով՝ համահայկական խաղերը միշտ հայ երիտասարդներին հայրենիք բերելու, Հայաստան-Սփյուռք կապերն ամրապնդելու լավագույն տարբերակներից են, սպորտն այստեղ պարզապես միջոց է: «Մենք այս ձեռնարկով ևս մեկ անգամ մեր ձայնը լսելի դարձրեցինք աշխարհին, ևս մեկ անգամ ապացուցեցինք, որ աշխարհի որ անկյունում էլ որ լինենք, միևնույնն է՝ միասնական ենք և կարող ենք պայքարել մեր արդար դատի համար»,- ասաց Պերճ Հալաջյանը:
Սփյուռքը խորհրդանշող ջահը, կտրելով Նեղոսը, հասավ հավերժության հետ մրցակցության մեջ մտած եգիպտական բուրգեր ՝ իր հետ Հայաստան բերելով հավերժի գաղափարը:
Բաժանորդագրվեք մեր ալիքին Telegram-ում