ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ: ՀՀ էներգետիկայի և բնական պաշարների նախարար Երվանդ Զախարյանը չի կարծում, որ Հայաստանում էլեկտրաէներգիայի սակագինը կթանկանա 17 դրամով: Սարդարապատում լրագրողների հետ զրույցում նախարարն ընդգծեց, որ էլեկտրաէներգիայի թանկացումը մտահոգում է բոլորին՝ հավելելով, որ հասկանում է դրա դեմ բողոքող ցուցարարներին:

«Հանրային ծառսյությունները կարգավորող հանձնաժողովն այժմ ուսումնասիրում է էլեկտրաէներգիայի սակագնի բարձրացման հայտը, մեկ շաբաթից ուսումնասիրությունները կավարտվեն: Չեմ կարծում, որ սակագինը կբարձրանա 17 դրամով, իսկ մնացած հարցերին կպատասխնի հանձնաժողովը»,- հայտնեց նախարարը:

Երվանդ Զախարյանը ևս մեկ անգամ շեշտեց, որ որևէ մեկի համար թանկացումը ցանկալի չէ, և այդ հարցը մտահոգում է բոլորին:

«Հայաստանի էլեկտրական ցանցեր» ընկերությունը  դիմել է Հանրային ծառայությունները  կարգավորող հանձնաժողով՝ հոսանքի սակագինը 40-53 տոկոսով բաձրացնելու համար: ՀԷՑ-ն առաջարկում է 1 կՎտ-ի սակագինը բարձրացնել  մինչեւ 58 եւ 48 դրամ գիշերվա և ցերակվա համար: Ներկայումս սակագինը կազմում է 1 կՎտ-ի համար 41,85 դրամ ցերեկը, եւ  31,85 դրամ՝ գիշերը։