Սիրիայի հայկական վարժարանների աշակերտներն ավարտել են ուսումնական տարին
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Սիրիահայ վարժարանների աշակերտները հանձնել են 2014-2015 ուսումնական տարվա երկրորդ կիսամյակային քննությունները և ավարտել են ուսումնական տարին: Այս մասին «Արմենպրես»-ը տեղեկացավ «Գանձասար» թերթի ֆեյբուքյան էջից: Ավարտական քննություններին կմասնակցեն միջնակարգ դպրոցների աշակերտները, որից հետո կսկսվեն բակալավրի պետական քննությունները:
Հալեպում ապահովական վիճակը շարունակում է մնալ անկայուն: Բարելավվել է ջրի և էլեկտրաէներգիայի մատակարարումը: Համացանցը դեռ չի գործում:
Հայաշատ Հալեպ քաղաքը 2012թ. ամռանից ի վեր հայտնվել է կառավարական ուժերի և զինված խմբավորումների, այդ թվում` «Ջաբհա ան Նուսրա» և այլ իսլամիստական, ինչպես նաև Արևմուտքից աջակցություն ստացող ընդդիմադիր տասնյակ խմբավորումների բախումների թիրախում:
Բախումներն այնտեղ մինչև օրս շարունակվում են: Քաղաքի արևմտյան թաղամասերը գտնվում են կառավարական ուժերի, իսկ արևելյան թաղամասերը` զինված խմբավորումների հսկողության տակ:
Բաժանորդագրվեք մեր ալիքին Telegram-ում