Եմենի հակամարտության ընթացքում զոհվել է 1037 մարդ
ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: Եմենի հակամարտության հետևանքով զոհվել է 1037 և վիրավորվել 2453 մարդ: Ինչպես հաղորդում է «Արմենպրես»-ը` վկայակոչելով արաբական լրատվամիջոցները, այս մասին Ժնևում հայտարարել է ՄԱԿ-ի Մարդու իրավունքների պաշտպանության գերագույն հանձանկատարի պաշտոնական ներկայացուցիչ Սեսիլ Պույին: «Տվյալներն ընդգրկում են մարտի 26-ից մայիսի 20-ն ընկած ժամանակահատվածը»,- նշել է նա:
Եմենի բանակը և շիա ապստամբները մայիսի 22-ին գրավել են եմենա-սաուդական սահմանի մոտ գտնվող սաուդական ալ Մազեբ ռազմական բազան: Սաուդյան Արաբիայի Զահրա շրջանի սահմանային տարածքների ռմբակոծության հետևանքով մեկ սաուդցի է զոհվել, ևս մեկը վիրավորվել է:
Այսօր՝ մայիսի 22-ին, պայթյուն է որոտացել Եմենի մայրաքաղաքի շիական մզկիթում, որի հետևանքով 13 մարդ է վիրավորվել: Արաբական դաշինքի ղեկավարության ներակացուցիչ Ահմադ Ասիրին հայտարարել է, որ Եմենում շիա ապստամբների դեմ ռմբակոծությունը կշարունակվի մինչև նրանց վերջնական տապալումը:
Եմենում իրավիճակն առավել սրվել էր 2015թ.-ի հունվարից, երբ շիա ապստամբները գրավել էին մայրաքաղաք Սանան: Ապստամբների ճնշման տակ նախագահ Աբդ Ռաբբո Մանսուր ալ Հադին և վարչապետ Խալեդ Բախախը հրաժարական էին տվել: Որոշ ժամանակ անց նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ անց՝ մարտի 25-ին շիաների Ադեն մտնելուց հետո, հեռացել էր երկրից:
Նախագահը դիմել է Սաուդյան Արաբիային` խնդրելով միջամտել ստեղծված իրավիճակին: Մարտի 26-ին Սաուդյան Արաբիան Բահրեյնի, Կատարի, Քուվեյթի, ԱՄԷ-ի օդային ուժերի օգնությամբ Եմենում սկսել է «Վճռականության փոթորիկ» գործողությունները, որոնց ավարտից հետո ռազմական գործողությունների մյուս փուլը կոչվել է «Հույսի վերականգնում»:
Բաժանորդագրվեք մեր ալիքին Telegram-ում