Մարգարիտա Սիմոնյանը ներկայացրել է ցեղասպանության ժամանակ իր գերդաստանի հետ կատարվածը
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Russia Today հեռուստաալիքի գլխավոր խմբագիր Մարգարիտա Սիմոնյանը թվիթերի իր էջում ներկայացրել է Հայոց ցեղասպանության ժամանակ իր ընտանիքի հետ կատարված ողբերգությունները: Ինչպես տեղեկացնում է «Արմենպրես»-ը՝ Մարգարիտա Սիմոնյանը նշել է.
«Հարյուր տարի առաջ սպանել են իմ նախատատի ընտանիքին: Նրա ծնողներին, ավագ եղբայրներին ու քույրերին մորթել են նրա աչքի առաջ: Իմ նախատատին և նրա փոքր քույր Ալիսային վերցրել է մի թուրք ընտանիք. գեղեցիկ փոքրիկ աղջիկներին, չգիտես ինչու, չէին սպանում: Իմ նախատատը թուրք ընտանիքից փախել է Ղրիմ: Այդպես մեր ընտանիքը հաստատվել է Ռուսաստանում: Նրա քույրը մնացել է Թուրքիայում: Մենք չգիտենք նրա ճակատագրի մասին: Իմ մյուս նախատատը ողջ է մնացել միայն այն պատճառով, որ նրան փոքր տարիքում փաթաթել են գորգի մեջ, և թուրքերը նրան չեն նկատել»:
Նա հավելել է, որ իր նախատատն այդ ժամանակ հինգ տարեկան է եղել: Փաթաթված գորգի մեջ՝ նա լսել է, թե ինչպես են սպանում իր ողջ ընտանիքը: Եվ ողջ է մնացել, միայնակ:
«Այսօր Հայաստանը և աշխարհի այն հատվածը, որի համար խիղճը և ճշմարտությունը քաղաքական նպատակահարմարությունից ավելի կարևոր են, հիշում են այդ զոհերին»,-ընդգծել է նա:
Սիմոնյանը խաղաղություն է մաղթել իր բոլոր նախնիներին և նրանց գազանաբար սպանված երեխաներին:
«Իմ հոգում չկա ատելություն ոչ մեկի նկատմամբ: Բայց ես երբեք չեմ մոռանա»,- գրել է Սիմոնյանը: Նա իր բոլոր գրառումներում օգտագործել է #геноцидармян հաշթեգը:
Թվիթերում ակտիվ է նաև ռուս լրագրող Վլադիմիր Սոլովյովը, ով տարածում է ցեղասպանությանը նվիրված թվիթներ:
Առաջին համաշխարհային պատերազմի նախօրեին Օսմանյան կայսրությունում ապրում էին մոտ երկու միլիոն հայեր: Շուրջ մեկուկես միլիոն հայ սպանվեցին 1915-1923 թթ. ժամանակահատվածում, իսկ մնացածները կամ բռնի մահմեդականացվեցին, կամ ապաստանեցին աշխարհի տարբեր երկրներում: 1915 թ. ապրիլի 24-ին սկիզբ առած ձերբակալություններով (հիմնականում` Օսմանյան կայսրության մայրաքաղաք Կոստանդնուպոլսում) եւ դրան հետեւած հարյուրավոր հայ մտավորականների ոչնչացումով սկսվեց հայ բնակչության բնաջնջման առաջին փուլը: Հետագայում աշխարհասփյուռ հայերը ապրիլի 24-ը սկսեցին նշել որպես Հայոց ցեղասպանության զոհերի հիշատակի օր:
Լուսանկարը` ТАСС
Բաժանորդագրվեք մեր ալիքին Telegram-ում