Լյուքսեմբուրգի խորհրդարանում Հայոց ցեղասպանության ճանաչման միջնորդագիր կներկայացվի
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ: Լյուքսեմբուրգի ընդդիմադիր Քրիստոնեա սոցիալ-ժողովրդավարական կուսակցությունը ծրագրում է միջնորդագիր ներկայացնել խորհրդարան` հայերի 1915-1918 թվականների կոտորածները պաշտոնապես որպես ցեղասպանություն ճանաչելու համար: «Արմենպրես»-ի փոխանցմամբ` այս մասին հայտնում է Luxemburger Wort օրաթերթը:
Այդ կուսակցության ներկայացուցիչ, պատգամավոր Լորեն Մոսարը ապրիլի 21-ին հայտարարել է, որ կուսակցությունը մտադիր է ներկայացնել միջնորդություն: Սրան նախորդել են Հայոց ցեղասպանության ոգեկոչման արարողությունները:
1915 թվականի Հայոց ցեղասպանությանը զոհ է գնացել մոտ 1.5 մլն մարդ: 20-րդ դարի այս զանվածային բնաջնջումը, տեղահանությունները և մահվան երթերը համարվում են նախորդ դարի առաջին ցեղասպանությունը: Սակայն մինչ օրս Թուրքիան հրաժարվում է դրանք ցեղասպանություն անվանել:
Հայոց ցեղասպանությունը ճանաչել են այնպիսի կազմակերպություններ, ինչպիսիք են Եվրոպայի խորհուրդը, Եվրախորհրդարանը, ՄԱԿ-ի մի քանի հանձնաժողովներ, Եկեղեցիների համաշխարհային խորհուրդը եւ այլն: Հայոց ցեղասպանությունը ճանաչել են շատ պետություններ. առաջինը պաշտոնապես ընդունել է Ուրուգվայը 1965 թ-ին: Նրան հետեւել են Ֆրանսիան, Իտալիան, Բելգիան, Նիդեռլանդները, Շվեյցարիան, Շվեդիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսը, Լիբանանը, Արգենտինան (2 օրենք, 5 բանաձեւ), Վենեսուելան, Չիլին, Կանադան, Վատիկանը: Իսկ բոլորովին վերջերս Հայոց ցեղասպանության ճանաչման վերաբերյալ իրենց դիրքորոշումը պաշտոնապես հաստատեցին Հռոմի Ֆրանցիսկոս պապը և Եվրոպական խորհրդարանը:
Լուսանկարը` wikipedia
Բաժանորդագրվեք մեր ալիքին Telegram-ում