ԵՐԵՎԱՆ, 20 ԱՊՐԻԼԻ, ԱՐՄԵՆՊՐԵՍ: Առաջին համաշխարհային պատերազմին նվիրված հատուկ կայքում իր ուրույն տեղը կզբաղեցնեն Հայոց ցեղասպանության տարելիցի դեպքերին առնչվող վկայությունները: ՀՀ-ում Ֆրանսիայի դեսպանության Մշակույթի և համագործակցության հարցերով խորհրդական Ժան-Միշել Գասպարյանն ապրիլի 20-ին լրագրողների հետ զրույցում տեղեկացրեց, որ մայիսի սկզբին հանրությանը ներկայացվող կայքում կլինի ցեղասպանության վիրտուալ թանգարան, որում կլինեն ցեղասպանությանը նվիրված սրահներ:

«Այս նախագիծը հնարավորություն դարձավ Հայաստանի և Ֆրանսիայի արխիվների համագործակցության շնորհիվ: Կներկայացվեն Սևրի պայմանագրի ժամանակ Հայաստանի պատվիրակությանը վերաբերող բոլոր փաստաթղթերը: Կայքն արդեն պատրաստ է, բայց պաշտոնական բացումը մայիսի սկզբին պետք է լինի: Տեսանյութեր կան, նկարներ, շատ հետաքրքիր փաստաթղթեր: Ընդհանուր կայքն առաջին համաշխարհային պատերազմին է վերաբերում»,-«Արմենպրես»-ի փոխանցմամբ՝ նշեց Ժան-Միշել Գասպարյանը:

Նա նաև հավելեց, որ ապրիլի 18-ին Երևանի օպերայի և բալետի ազգային ակադեմիական թատրոնում անցկացվել է ցեղասպանության տարելիցին նվիրված համերգ, որին մասնակցել են հայկական և ֆրանսիական դպրոցների աշակերտները և կատարել Վաչե Շարաֆյանի նոր ստեղծագործությունը: «Համերգը մեծ հաջողությամբ անցավ: Նույն համերգը տեղի է ունենալու նաև Ֆրանսիայում և ՅՈՒՆԵՍԿՕ-ում:  Հայ և ֆրանսիացի երեխաներն ամբողջ աշխարհի առջև են հանդես գալու»,-հավելեց Ժան-Միշել Գասպարյանը: