Իրականացվող բոլոր ծրագրերը դրական արդյունքները կտան տնտեսության զարգացման գործում. ՀՀ վարչապետ
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Հայաստանի վարչապետ Հովիկ Աբրահամյանը համոզված է, որ 2015 թվականին Հայաստանում կարձանագրվի տնտեսական աճ: Ինչպես հաղորդում է «Արմենպրես»-ը, այդ մասին վարչապետը՝ Ծաղկաձորում անցկացվող «Հայաստանի Հանրապետության տնտեսական համակարգը. նորարարություն, զարգացում, իրագործում» խորագրով միջբուհական ուսանողական գիտաժողովի ժամանակ: «Ես հուսով եմ և համոզված, որ այն ծրագրերը, որոնք կյանքի են կոչվում և ընթացքի մեջ են, 2015 թվականի երկրորդ կիսամյակից կտան իրենց արդյունքները: Կան բազմաթիվ կանխատեսումներ, որ մենք ունենալու ենք տնտեսական անկում՝ հաշվի առնելով տարածաշրջանի լարվածությունը, Ռուսաստան-Արևմուտք հարաբերությունները և այն պատժամիջոցները, որոնք կիրառվում են Ռուսաստանի նկատմամբ: Սակայն ես համոզված եմ, որ մենք 2015 թվականին արձանագրելու ենք տնտեսական աճ»,- նշեց վարչապետը:
Միաժամանակ, կառավարության ղեկավարը նշեց, որ ոչ ոք չէր կարող ծրագրել, որ 2015 թվականին կարձանագրվի ռուսական ռուբլու արժեզրկում, ինչը նաև իր բացասական ազդեցությունն է ունենում Հայաստանի տնտեսության վրա: Չնայած դրան, Հովիկ Աբրահամյանն ընդգծեց, որ այս տարվա հունվար-փետրվար ամիսներին ՀՀ-ում արձանագրվել է 1,8 տոկոսի տնտեսական աճ և, վարչապետի կարծիքով, առաջին եռամսյակում այդ դրական տեղաշարժն ակնհայտ կլինի:
Կառավարության ղեկավարը տեղեկացրեց, որ առաջիկա օրերին տվյալները կհրապարակվեն և կարծիք հայտնեց, որ կունենանք 2,5-3 տոկոսի տնտեսական աճ: Վարչապետի համոզմամբ՝ միասնական ուժերով 2015 թ. իրականացվող բոլոր ծրագրերն իրենց դրական արդյունքները կտան մեր տնտեսության զարգացման գործում:
Բաժանորդագրվեք մեր ալիքին Telegram-ում