Խարբերդի մանկատան 180 սաները կտեղափոխվեն Խնամքի հաստատություն
ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: Սոցիալական պաշտպանության ոլորտում իրականացվող բարեփոխումների շրջանակում նախատեսվում է ՀՀ աշխատանքի և սոցիալական հարցերի նախարարության համակարգում գործող Երեխաների խնամքի և պաշտպանության թիվ 1 գիշերօթիկ հաստատությունը վերանվանել մտավոր և հոգեկան առողջության խնդիրներ ունեցող անձանց շուրջօրյա խնամքի հաստատության: Միաժամանակ, 2015-2016թթ. ընթացքում ստեղծվող խնամքի հաստատություն կտեղափոխվեն Խարբերդի մասնագիտացված մանկատան 18 տարին լրացած 180 սաները` համապատասխան թվով աշխատակազմի հետ միասին: Նույն չափով կնվազեցվեն Խարբերդի մասնագիտացված մանկատան խնամվողների և աշխատողների թվաքանակները:
«Արմենպրես»-ի հաղորդմամբ` այդ մասին հարցն ընդգրկված է ՀՀ կառավարության ապրիլի 2-ի նիստի օրակարգում:
Միաժամանակ աշխատանքներ են տարվելու գիշերօթիկ հաստատությունում ներկա դրությամբ բնակվող երեխաների ընտանիքների հետ, ինչպես նաև կատարվելու է երեխաների կարիքների գնահատում, արդյունքում` երեխաների գնահատված կարիքներին համապատասխան նրանք կտեղավորվեն այլ հաստատություններում կամ կվերադառնան իրենց կենսաբանական ընտանիքներ:
Խարբերդի մասնագիտացված մանկատնից չափահաս դարձած սաների տեղափոխությունը ևս կիրականացվի նրանց կարիքների գնահատման և ընտանիքների ուսումնասիրության հիման վրա:
Ստեղծվող Խնամքի հաստատությունում խնամվողները ապահովվելու են կացարանով, անկողնային և անձնական սպիտակեղենով, հագուստով, կոշկեղենով, օրը երեք անգամյա սննդով, համապատասխան տնտեսական և հիգիենիկ պարագաներով, էրգոթերապիայի /աշխատանքային թերապիա/ և արտթերապիայի /արվեստի թերապիա/ համար անհրաժեշտ պարագաներով և նյութերով, ինչպես նաև կենսապահովման համար անհրաժեշտ գույքով և սարքավորումներով: Համապատասխան մասնագետների միջոցով նրանց կտրամադրվեն բժշկական օգնության և սպասարկման, սոցիալ-հոգեբանական և իրավաբանական խորհրդատվության ծառայություններ: Խնամվողները կկարողանան ազատ հանդիպել իրենց հարազատների և ընկերների հետ: Նրանց համար կկազմակերպվեն բազմաբնույթ միջոցառումներ: Խնամքի տանը կլինի նաև սոցիալական սպասարկողի և մասնագիտացված բուժքրոջ շուրջօրյա հերթապահություն:
Բաժանորդագրվեք մեր ալիքին Telegram-ում