Նյու Յորքում երեք շենք է փլվել գազի պայթյունի պատճառով
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Նյու Յորքի Իսթ-Վիլիջ շրջանում՝ Մանհեթենում, երեք շենք է փլվել, եւս չորս շենք՝ կրակից լրջորեն վնասվել գազի պայթյունի պատճառով: Ինչպես տեղեկացնում է «Արմենպրես»-ը, այս տվյալները հրապարակել են գերքաղաքի արտակարգ ծառայությունների պաշտոնական ներկայացուցիչները:
Նրանց տեղեկատվության համաձայն՝ պատահարի հետեւանքով տուժել է 19 մարդ:
Առանձին տեղամասերում հրշեջներին առայժմ չի հաջողվել ամբողջովին մարել կրակը, սակայն վնասված շենքերից ոչ մեկում արդեն մարդիկ չեն մնացել: Բոլոր տուժածները հոսպիտալացվել են, նրանցից չորսի վիճակը գնահատվում է ծանր: Պատահարի վայրը շրջապատված է իրավապահ մարմինների ուժերի կողմից:
Ինչպես հաղորդվել է ավելի վաղ, միջադեպից առաջ շենքում, որտեղ ենթադրաբար որոտացել է պայթյունը, կատարվել են գազամատակարարման հետ կապված աշխատանքներ: Իշխանությունները հայտարարել են հետաքննություն սկսելու մասին, հաղորդել է ՏԱՍՍ-ը:
Բաժանորդագրվեք մեր ալիքին Telegram-ում