Եմենի Նախագահը մեկնել է Օման
ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: Եմենի Նախագահ Աբդ Ռաբբո Մանսուր ալ Հադին մարտի 26-ին հասել է Օման: Նրան ուղեկցել է Եմենի հետախուզական ծառայության ղեկավար Ալի ալ Ահմադին: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, Ռուսաստանը և Չինաստանը մտահոգություն են հայտնել Եմենում տեղի ունեցող իրադարձությունների վերաբերյալ՝ կոչ անելով կողմերին նստել երկխոսությունների սեղանի շուրջ: Իր հերթին Իրանը խստորեն դատապարտել է ռազմական միջամտությունը և կոչ արել դադարեցնել այն՝ խնդիրը լուծելով քաղաքական ճանապարհով: Իրանը վտանգավոր է համարել Սաուդյան Արաբիայի քայլը: Թուրքիան և Մեծ Բրիտանիան հայտարարել են Սաուդյան Արաբիային իրենց աջակցության մասին:
Սաուդյան Արաբիան մտադիր է նաև ցամաքային հարձակում իրականացնել Եմենում: Տեղեկություններ կան, որ Սաուդյան Արաբիան նոր հարձակումներ է իրականացրել Եմենում: Ստեղծված լարված իրավիճակի պատճառով Եմենում փակվել են բոլոր գլխավոր նավահանգիստները: Ռմբակոծությունների հետևանքով զոհերի թիվը հասել է 20-ի, իսկ վիրավորներինը՝ գերազանցել է 30-ը: Ավելի վաղ արաբական ռազմական դաշինքը հայտարարել է Եմենի օդային և ծովային շրջափակման մասին: Կեսգիշերին Սաուդյան Արաբիան այլ երկրների հետ միասին ռազմական գործություններ է սկսել Եմենում շիա ապստամբների դեմ, որոնք կոչվել են «Վճռականության փոթորիկ»:
Բաժանորդագրվեք մեր ալիքին Telegram-ում