Վաշինգտոնում ցուցադրվել է «Մեկ դար տևող ցեղասպանություն: Բաքվի սև հունվարը» ֆիլմը
ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: ԱՄՆ-ում Լեռնային Ղարաբաղի Հանրապետության Մշտական ներկայացուցչությունը Վաշինգտոնի Սուրբ Մարիամ Աստվածածին եկեղեցում մարտի 24-ին կազմակերպել է «Մեկ դար տևող ցեղասպանություն: Բաքվի սև հունվարը» վավերագրական ֆիլմի ցուցադրումը: Ֆիլմի ցուցադրումից առաջ տեղի է ունեցել ընդունելություն: Ինչպես «Արմենպրես»-ին տեղեկացրին ԼՂՀ արտգործնախարարության տեղեկատվական վարչությունից, ԱՄՆ-ում ԼՂՀ Մշտական ներկայացուցիչ Ռոբերտ Ավետիսյանը բացման իր խոսքում համառոտ ներկայացրել է ֆիլմի նպատակը, Բաքվի հայ համայնքի պատմությունը և ընդգծել զոհերի հիշատակման կարևորությունը:
Ֆիլմի ցուցադրումից հետո Արցախի ներկայացուցիչը և միջոցառմանը ներկա ֆիլմի ստեղծագործական թիմի անդամ, լրագրող Հայկարամ Նահապետյանը պատասխանել են ներկաների հարցերին: Միջոցառման մասնակիցներին իր խոսքն է ուղղել նաև Սուրբ Մարիամ եկեղեցու քահանա Տեր Հովսեփ Կարապետյանը:
Միջոցառմանը ներկա են եղել ԱՄՆ-ում Հայաստանի Հանրապետության դեսպան Տիգրան Սարգսյանը, դեսպանության անձնակազմը, հայկական կազմակերպությունների ներկայացուցիչներ և հայ համայնքի անդամներ:
Բաժանորդագրվեք մեր ալիքին Telegram-ում