ԲՀԿ-ն լքեց ևս մեկ պատգամավոր
ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: Ազգային ժողովի ԲՀԿ խմբակցության պատգամավոր Բազմասեր Առաքելյանը «Բարգավաճ Հայաստան» կուսակցությունը լքելու մասին դիմում է ներկայացրել: «Արմենպրես»-ի հաղորդմամբ՝ պատգամավորը հայտարարություն է տարածել, որում էլ տեղեկացրել է ԲՀԿ-ն լքելու մասին:
««Բարգավաճ Հայաստան» կուսակցության կազմում իմ հետագա անդամակցության դադարեցումը չունի ոչ մի քաղաքական դրդապատճառ, պարզապես քաղաքական զարգացումների արդյունքում իմ հետագա քայլերը կշարունակեմ խմբակցությունում, սակայն ոչ կուսակցության կազմում: Մարդկային իմ տեսակը ճանաչողները գիտեն և կհասկանան ինձ: Շարունակելու եմ իմ կողմից որդեգրած ավանդույթը` մշտապես լինելու եմ իմ բազմահազար ընտրողների կողքին, քանի որ նրանց վստահության քվեի կրողն եմ, իսկ որպես անկախ պատգամավոր լինելու եմ Հայաստանի Հանրապետության առաջընթացին և զարգացմանը ուղղված ամեն մի քայլի կրող»,-ասված է նրա տարածած հաղորդագրությունում:
«Բարգավաճ Հայաստան» կուսակցությունը լքելու մասին դիմում է ներկայացրել նաև պատգամավոր Վարդան Օսկանյանը: Պատգամավորներ Դավիթ Քոչարյանը, Մուշեղ Պետոյանը, Արագած Ախոյանը, Հարություն Ղարագյոզյանը, Գրիգորի Մարգարյանը, Կարո Կարապետյանը: ԲՀԿ խմբակցության պատգամավոր Մելիք Մանուկյանը պատգամավորի մանդատը վայր դնելու մասին դիմում էր գրել ԱԺ նախագահ Գալուստ Սահակյանին, սակայն դիմումի հրապարակումից մի քանի օր անց պատգամավորն այն հետ վերցրեց:
Բաժանորդագրվեք մեր ալիքին Telegram-ում