Գեղարքունիքը եւ Երեւանի Նոր Նորքի վարչական շրջանը համագործակցության հուշագիր են ստորագրել
ԳԱՎԱՌ, 4 ՄԱՐՏԻ, ԱՐՄԵՆՊՐԵՍ: Գեղարքունիքի մարզպետարանում համագործակցության հուշագիր ստորագրվեց Գեղարքունիքի մարզի եւ Երեւան քաղաքի Նոր Նորք վարչական շրջանի միջեւ: Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի տեղեկատվության եւ հասարակակնության հետ կապերի բաժնից, Համագործակցության հուշագիրը ստորագրեցին Գեղարքունիքի մարզպետ Ռաֆիկ Գրիգորյանը եւ Նոր Նորք վարչական շրջանի ղեկավար Արմեն Ուլիխանյանը: Հուշագրի ստորագրմանը ներկա էին երկու կողմերի ղեկավարների տեղակալները, պատասխանատու ստորաբաժանումների ղեկավարներ:
Ըստ ստորագրված հուշագրի՝ կողմերը պատրաստակամություն հայտնեցին համագործակցել տեղական ինքնակառավարման, կրթության, մշակույթի, սպորտի, բնապահպանության, տուրիզմի, սոցիալական ապահովության եւ առողջապահության բնագավառներում: Կողմերը բարենպաստ պայմաններ կստեղծեն գործնական համագործակցության զարգացման համար, կիրականացնեն համատեղ ծրագրեր, կմասնակցեն հուշագրի իրականացման աշխատանքներին, երկուստեք կազմակերպվող հանդիպումներին, քննարկումներին և միջոցառումներին:
«Մենք պատրաստակամ ենք շարունակելու ստեղծված ավանդույթը եւ ավելի բազմակողմանի համագործակցություն ծավալելու: Ես համոզված եմ, որ կարճ ժամանակահատվածում այս համագործակցությունը կլինի արդյունավետ ու շոշափելի»- իր խոսքում նշեց Նոր Նորք վարչական շրջանի ղեկավար Արմեն Ուլիխանյանը:
Գեղարքունիքի մարզպետ Ռաֆիկ Գրիգորյանը ողջունեց Երեւանի քաղաքապետ Տարոն Մարգարյանի այս նախաձեռնությունը` հույս հայտնելով, որ համագործակցության արդյունքը պետք է տեսնել ոչ միայն ոլորտների, այլ նաև Գեղարքունիքի մարզի եւ Նոր Նորք վարչական շրջանի բնակիչների միջեւ: «Հուշագիրը մեզ համար ուղեցույց կլինի, սակայն մենք ըստ անհրաժեշտության պետք է նաեւ համագործակցենք հուշագրից դուրս, մեր նոր նախաձեռնություններով ու մտահղացումներով, որպեսզի այն լինի փոխշահավետ, բովանդակային եւ տեսանելի: Մեր համագործակցությունը մենք պետք է ցույց տանք մեր աշխատանքով» - ավելացրեց Գեղարքունիքի մարզպետը: Կողմերի միջև հաջորդ հանդիպումը կկայանա մայրաքաղաքի Նոր Նորք վարչական շրջանում:
Խոսրով Խլղաթյան
Բաժանորդագրվեք մեր ալիքին Telegram-ում