Գագիկ Բեգլարյանը կարևորել է Երևան-Էրբիլ չվերթը երկկողմ հարաբերությունների զարգացման առումով
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: Պաշտոնական այցով Հայաստանում է Իրաքի Հանրապետության տրանսպորտի նախարար Բաքիր Ջաբեր ալ Զուբաիդիին և նրա գլխավորած պատվիրակությունը, ովքեր Երևան էին ժամանել փետրվարի 26-ին առաջին անգամ կայացած Բաղդադ-Երևան-Էրբիլ ուղիղ չվերթով:
Ինչպես «Արմենպրես»-ին տեղեկացրին ՀՀ տրանսպորտի և կապի նախարարության լրատվական ծառայությունից, փետրվարի 27-ի առավոտյան տրանսպորտի և կապի նախարարության ներկայացուցիչների ուղեկցությամբ պատվիրակությունը եղել է Ծիծեռնակաբերդի բարձունքում, ծաղիկներ դրել Մեծ եղեռնի զոհերի հիշատակը հավերժացնող հուշահամալիրին և մեկ րոպե լռությամբ հարգել 20-րդ դարի առաջին ցեղասպանության անմեղ զոհերի հիշատակը:
Պատվիրակությունն այցելել է նաև Հայոց ցեղասպանության թանգարան-ինստիտուտ, ծանոթացել ցուցադրված նյութերին: Այնուհետև ՀՀ տրանսպորտի և կապի նախարարությունում Իրաքի Հանրապետության տրանսպորտի նախարար Բաքիր Ջաբեր ալ Զուբաիդիի գլխավորած պատվիրակությանն ընդունել է ՀՀ տրանսպորտի և կապի նախարար Գագիկ Բեգլարյանը:
Ողջունելով բարձրաստիճան հյուրերին՝ նախարարը կարևորել է իրաքցի գործընկերոջ այցը Հայաստան՝ Բաղդադ-Երևան-Էրբիլ ուղիղ չվերթով, որպես տրանսպորտի ոլորտում հայ-իրաքյան հարաբերությունների զարգացման և ամրապնդման կարևոր քայլ:
Շնորհակալություն հայտնելով Գագիկ Բեգլարյանին ջերմ ընդունելության համար՝ Իրաքի Հանրապետության տրանսպորտի նախարար Բաքիր Ջաբեր ալ Զուբաիդին շեշտել է, որ Բաղդադ-Երևան-Էրբիլ ուղիղ չվերթի մեկնարկով նոր հնարավորություններ են բացվում երկու երկրների առևտրաշրջանառության, ուղևորափոխադրումների և գործընկերային հարաբերությունների զարգացման համար:
Բաժանորդագրվեք մեր ալիքին Telegram-ում