Հայաստանը և ԵՄ-ն քննարկում են համագործակցությունը շարունակելու ուղիները
ԵՐԵՎԱՆ, 26 ՀՈՒՆՎԱՐԻ, ԱՐՄԵՆՊՐԵՍ: Հայաստանը և Եվրոպական միությունը համատեղ քննարկում են համագործակցությունը շարունակելու նոր իրավական հիմքեր ձևավորելու հարցը: Այս մասին հունվարի 26-ին լրագրողների հետ հանդիպմանն ասաց ՀՀ ԱԳ նախարար Էդվարդ Նալբանդյանը: «Մենք Եվրամիության հետ քննարկում ենք համագործակցության համար իրավական հիմք ձևավորելու հարցը, որովհետև երկու կողմերն էլ ցանկություն ունեն շարունակել, խորացնել և զարգացնել համագործակցությունը»,- «Արմենպրես»-ի հաղորդմամբ՝ նշեց նախարարը:
Նա ընդգծեց, որ թե Եվրամիությունը, թե Հայաստանը հայտարարել են համագործակցությունն ամրապնդելու և խորացնելու իրենց ցանկության մասին: «Վերջերս Բրյուսելում Հայաստան-Եվրոպական միություն համագործակցության 15-րդ խորհրդաժողովի ընթացքում Եվրոպական միության ներկայացուցիչներն ինձ ասում էին, որ ցանկանում են Հայաստանի հետ շարունակել համագործակցությունը և դրա համար հարկավոր է գտնել իրավական հիմքը, որը չի խանգարի Հայաստանի՝ այլ ինտեգրացիոն գործընթացներում ներգրավվածությանը: Կարող եմ ասել, որ մենք ընդհանուր միասնական ձգտում ունենք շարժվել առաջ»,- նշեց նախարարը:
2013թ. նոյեմբերին Վիլնյուսում կայացած գագաթնաժողովի ժամանակ Հայաստանն ու Եվրամիությունըհանդես եկան հայտարարությամբ` շարունակելու համագործակցությունը այն ոլորտներում, որոնք չենհակասի Հայաստանի` ԵՏՄ-ի հետ համագործակցությանը:
Բաժանորդագրվեք մեր ալիքին Telegram-ում