Հալեպի հայկական դպրոցներում տոնական միջոցառումներ տեղի կունենան
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Թեև Հալեպում Ամանորի մոտալուտ գալուստը հուշող որևէ երևույթ չկա և մարդիկ տոնական տրամադրություն չունեն քաղաքում տիրող մթնոլորտի պատճառով, այնուամենայնիվ, հայկական դպրոցներում և ակումբներում տոնական միջոցառումներ են նախատեսվում: Այս մասին «Արմենպրես»-ին տեղեկացրեց Հալեպի մեր աղբյուրը՝ ավելացնելով, որ միջոցառումները տեղի կունենան զուսպ և զգույշ: Աղբյուրի տեղեկացմամբ` քաղաքում կրկին էլեկտրաէներգիայի խնդիր կա:
Նա նաև նշեց, որ դեկտեմբերի 17-ին մեծ հանդիսություն է տեղի ունեցել Դաշնակցության 124-ամյակի առիթով: Հանդիսությունից հետո հացկերույթ է կազմակերպվել: «Գանձասար» թերթի խմբագրությունից տեղեկացանք, որ տոնակատարությունը կրել է «124 տարի մտքի, կամքի և խղճի երթ» կարգախոսը:
Հանդիսությանը ներկա են եղել ՀՀ Հալեպի գլխավոր հյուպատոսը, ՀՅԴ բյուրոյի անդամ Հրանտ Մարգարյանը, հալեպահայ կազմակերպությունների, Բերիո թեմի ազգային իշխանությունների և հալեպահայ միությունների ներկայացուցիչները, այս առիթով Քեսաբից, Լաթաքիայից, Ղամիշլիից, Դամասկոսից մեծ թվով հայեր են ժամանել: Ներկաներին ցուցադրվել է տեսաերիզ ՀՅԴ պամության մասին: Ապա իր ելույթով հանդես է եկել Հրանտ Մարգարյանը:
ՀՅԴ 124-ամյակի հանդիսությունը փակվել է «Մշակ Բանվոր» քայլերգով:
Բաժանորդագրվեք մեր ալիքին Telegram-ում