Երևանի քաղաքապետ Տարոն Մարգարյանը շնորհավորել է «Արմենպրես»-ին
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Երևանի քաղաքապետ Տարոն Մարգարյանը շնորհավորել է «Արմենպրես» պետական լրատվական գործակալությանը` հիմնադրման 96-րդ տարեդարձի կապակցությամբ: «Վստահաբար կարող եմ ասել, որ ստեղծման օրվանից սկսած գործակալությունն իր կարևոր դերակատարումն է ունեցել ինչպես մեր երկրի քաղաքական և տնտեսական, այնպես էլ հասարակության կյանքի զարգացման գործում: Օպերատիվությամբ, հանրայնացվող օբեյտիվ ու անաչառ տեղեկատվությամբ, հասարակությանը հուզող բազում հարցերի բարձրացման և դրանց պատասխանները ստանալուն հետևողականորեն հետամուտ լինելու ձեր որդեգրած քաղաքականությունը հիրավի իր կարևոր դերակատարումն է ունեցել նաև մեր նորանկախ պետության կայացման գործում: «Արմենպրես»-ին և արմենպրեսականներին սրտանց մաղթում եմ հավատարիմ մնալ իրենց կոչմանն ու նույն նվիրումով շարունակել մեր երկրի և մեր սիրելի մայրաքաղաքի զարգացմանն ու հզորացմանը նպաստելու իրենց ազգանպաստ գործունեությանը»,-ասված է քաղաքապետի շնորհավորական խոսքում:
Դեկտեմբերի 18-ն «Արմենպրես»-ի հիմնադրման օրն է: 1918թ. Հայաստանի Ազգային խորհրդի հենց այդ օրվա նիստի արձանագրությունում ազդարարվեց Հայաստանի նորանկախ պետության համար մեծ իրադարձություն հանդիսացող Հայաստանի հեռագրական գործակալության ծնունդը: Վերջինիս հիմնման վերաբերյալ առաջին օրենքի ընդունմամբ երկրի բոլոր պետական ու հասարակական հիմնարկները պարտավորվել են տեղեկություններ տալ գործակալությանը, ընդ որում` արգելվել է նախքան դրանք գործակալությանը հաղորդելը տալ մասնավոր անձանց կամ հաստատություններին, ինչպես նաեւ գործակալության հեռագրերի արտատպումն այլ հրատարակություններում` բաժանորդ թերթերում դրանց հրապարակումից հետո 48 ժամվա ընթացքում:
Բաժանորդագրվեք մեր ալիքին Telegram-ում