ԹԲԻԼԻՍԻ, 1 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ սպորտի և երիտասարդության հարցերի նախարար Գաբրիել Ղազարյանի՝ 2014 թ. նոյեմբերի 28-ին Թբիլիսիում ստորագրած փոխըմբռնման հուշագրի դրույթների իրականացման վերաբերյալ  2015-2016 թվականների գործողությունների ծրագրով նախատեսվում է  սպորտի և երիտասարդության ոլորտներում փորձի ու տեղեկատվության փոխանակման, սպորտի զարգացման մոդելների մշակման, երիտասարդության ոլորտում համատեղ ուսումնասիրություններին ուղղված մի շարք միջոցառումների անցկացումը:

Ինչպես «Արմենպրես»-ին փոխանցեցին ՀՀ սպորտի եւ երիտասարդության նախարարության տեղեկատվության եւ հասարակայնության հետ կապերի վարչությունից, Թբիլիսի այցի ընթացքում նախարարը եղել է Վրաստանի սպորտի և ֆիզիկական կրթության համալսարանում, քննարկել ուսումնական հաստատության և Ֆիզիկական կուլտուրայի հայկական պետական ինստիտուտի գիտական, ուսումնական ոլորտներին առնչվող հետագա համագործակցության զարգացման հարցերը:

Վրաստանի Օլիմպիական ռեզերվի պատրաստման կենտրոն այցելության ընթացքում նախարարը ծանոթացել է վերագործարկված կենտրոնի շենքային պայմաններին, հետևել այնտեղ անցկացվող պարապմունքներին, քննարկել համատեղ ուսումնամարզական հավաքներ կազմակերպելու հարցերը: