ԳԱՎԱՌ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Երանոս գյուղի նորակառույց թաղամասում բարերարների միջոցներով կառուցվել է 500 մետր երկարությամբ խմելու ջրատարի ներքին ցանց, ինչի արդյունքում խմելու մշտական ջրով ապահովվել են 15 ընտանիք:

 Ինչպես «Արմենպրես»-ին տեղեկացրեց Երանոսի գյուղապետ  Ապետնակ Մովսեսյանը, թաղամասը գտնվում է գյուղի արեւմտյան հատվածում եւ մոտակա տարիների կտրվածքով ընդարձակման ու ծավալման հեռանկարներ ու հնարավորություններ ունի, ուստի նորակառույց խմելու ջրատարն ապագայում կծառայի նաեւ աճող եւ այստեղ բնակության տեղափոխվող նոր ընտանիքների կարիքներին: «5200 բնակիչ ունեցող Երանոսը տարեցտարի զարգանում ու ծավալվում է եկամտաբեր արտագնա աշխատանքի հաշվին: Յուրաքանչյուր տարի մեր գյուղում կառուցվում է առնվազն 15 նոր, ժամանակակից ու հարմարավետ առանձնատուն, իսկ գյուղապետարանը տեղական բյուջեի կամ գյուղի բարերարների հաշվին նորակառույց թաղամասերն ապահովում է խմելու ջրով, էլեկտրաէներգիայով ու բնական գազով»,-հավաստեց համայնքի ղեկավարը:

 Մի քանի օրվա ընթացքում  խմելու ջուրը կմիացվի բոլոր 15 բնակարանների տնային ցանցերին:

Խոսրով Խլղաթյան