ՀԱԿ պատգամավորն ակնկալում է բազմամարդ հանրահավաք
ԵՐԵՎԱՆ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Ազգային ժողովի ՀԱԿ խմբակցության քարտուղար Արամ Մանուկյանն ակնկալում է, որ եռյակի այսօրվա հանրահավաքի մասնակիցների թիվը մի փոքր ավելի կլինի նախորդ հանրահավաքի մասնակիցների թվից: Ազգային ժողովում ճեպազրույցների ժամին Մանուկյանն ընդգծեց, որ ինքն արդեն մոտավորապես պատկերացում ունի, թե քանի մարդ է մասնակցելու այսօրվա հանրահավաքին: «Վստահ կարող եմ ասել, որ գոնե անցյալ հանրահավաքի մասնակիցների թիվը մենք կունենանք նաև այսօր: Նույնիսկ ավելին՝ ես ակնկալում եմ, որ այսօր այդ թիվը մի փոքր ավելի կլինի նախորդից, եթե բարդություններ չառաջանան»,- նշեց Մանուկյանը:
Նա ընդգծեց, որ հեռու վայրերից հանրահավաքին մասնակցել ցանկացող քաղաքացիներն արդեն դուրս են եկել, իսկ մոտ բնակավայրերից դեպի մայրաքաղաքի Ազատության հրապարակ կշարժվեն մեկ ժամից: «Այս պահին կարող եմ ասել, որ դժվարություններ չկան: Միայն գյուղապետերը և ոստիկանության աշխատակիցները մարդկանց կանչում և համոզում են, որ մարդիկ չմասնակցեն հանրահավաքին: Միայն այսքանը»,- ընդգծեց Մանուկյանը:
Բաժանորդագրվեք մեր ալիքին Telegram-ում