Արարատի մարզպետը հետեւեց Անմահների հովտի շինարարական աշխատանքներին
ԱՐՏԱՇԱՏ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Արարատի մարզպետ Ռուբիկ Աբրահամյանը, ԵԿՄ Արտաշատի տարածաշրջանի նախագահ Մնացական Մարգարյանի եւ Արտաշատի քաղաքապետ Գագիկ Մուրադյանի ուղեկցությամբ այցելեց Անմահների հովիտ` շինարարական աշխատանքներին ծանոթանալու համար: Լսելով շինարարներին, ԵԿՄ նախագահին, ովքեր ներկայացրեցին հովտի ստեղծման գաղափարը, շինարարության հետ կապված հարցերն ու մանրամասները` մարզպետն ասաց, որ նահատակների հոգու առաջ յուրաքանչյուրս մեր պարտքն ունենք եւ խոստացավ ֆինանսապես օգնել:
Գարնանը սկսված շինարարական աշխատանքները վերսկսվել են սեպտեմբերին եւ շարունակվում են բուռն թափով: Արդեն ավարտվել են 400քմ տարածքում` արտաշատցի 78 նահատակների անուն-ազգանունների, կենսագրական տվյալների դաջման եւ փորագրման աշխատանքները: Պարսպի ճակատային մասի աշխատանքները կավարտվեն մի քանի օրից: Մատուռի շինարարական աշխատանքները մոտենում են ավարտին: Այս յուրօրինակ «Եռաբլուրը», որը կառուցվում է Արտաշատի տարածաշրջանի նահատակների հիշատակին, կունենա նաեւ ցայտաղբյուր, կանաչապատումից բացի, գարնանը շրջակայքը կզարդարվի ծաղիկներով: ԵԿՄ անդամների ջանքերով արդեն իսկ տնկվել է 40 ծառ ու թփեր: Անմահների հովտի պաշտոնական բացումը տեղի կունենա երկու շաբաթ հետո:
«Արմենպրես»-ի հետ զրույցում ԵԿՄ Արտաշատի տարածաշրջանի նախագահ Մարգարյանը նշեց, որ շինարարական աշխատանքների ավարտի համար անհրաժեշտ շինանյութի պակաս չկա: Բարենպաստ եղանակային պայմանների դեպքում վերոհիշյալ աշխատանքները կավարտվեն նախատեսված ժամկետներում:
Արտաշատի Եռաբլուրը կառուցվել է քաղաքի ԵԿՄ կազմակերպության նախագահ Մնացական Մարգարյանի եւ ԵԿՄ անդամների տքնաջան աշխատանքով: Քանդակագործ Վահե Խաչատրյանը չորս ամիս շարունակ կատարել է «ոսկերչի աշխատանք»` արցախյան ազատամարտում նահատակվածների անուն-ազգանունները քանդակելով բազալտե հուշակոթողին: Նա այնպիսի զգուշությամբ է աշխատել, որպեսզի մի տառ հանկարծ շեղ չլինի, որովհետեւ հարկ կլիներ փոխել ամբողջ քարը: Ճարտարապետ-նախագծողն է Արեգա Կարապետյանը, իսկ շինարար-կառուցողը` Գեւորգ Աղաջանյանը:
Անմահների հովիտը յուրօրինակ ուխտատեղի է ոչ միայն նահատակների ծնողների ու հարազատների, դպրոցականների:
Լիլիթ Մաճկալյան
Բաժանորդագրվեք մեր ալիքին Telegram-ում